Netgarður

Bamm Bamm

2008-09-05T16:43:00.000-07:00

Mér finnst að fólk eigi ekki að vera að vekja mig um nætur með því að vera að skjóta úti i loftið !

Að fá lög á heilann

2008-09-03T03:57:00.000-07:00

Ég veit ekki af hverju en einhverra hluta vegna virðist sem að þegar maður fær lög á heilann, þá eru það alltaf slæm lög eða hræðileg stef. Við fórum í bíó um daginn (að horfa á myndband er góð skemmtun) og sáum gamanmyndina Get Smart, sem er fínasta afþreying. Á undan myndinni var auglýsing frá símafyrirtækinu Sonofon með frekar hræðilegu hip hop stefi (sem má sjá hér). Ég fór svo út að skokka í gær til að liðka lappir og hreinsa hugann en það hefði ég betur látið ógert, alla vega partinn með að hreinsa hugann, því um leið og hugurinn var orðinn hreinn byrjaði hann að verða mengaður af þessu stefi, mér til mikilla ama. Þar áður hafði ég svo fengið þetta hræðilega kover Sign á heilann. Mér finnst að það eigi einhverjir vísindamenn að eyða bæði tíma og fjár í að komast að því hvað veldur þessu og finna leið til að fyrirbyggja að svona gerist.

Annars er ég búinn að versla mér flug til Íslands. Laugardaginn 20. september lendi ég á Íslandi klukkan hálf þrjú. Þá verður 2ja ára búsetu í Danaveldi lokið.

Aqua og Jókerinn

2008-07-29T05:38:00.000-07:00

Atli ákvað að kíkja í heimsókn til okkar um síðustu helgi. Ástæðan fyrir því voru tónleikar Aqua á Grønkoncert í Næstved en Aqua komu nýlega saman eftir ára langt hlé. Því var haldið í pílagrímaferð á laugardaginn var til Næstved, syðst á Sjálandi, til að berja goðin augum. Sökum mikils hita hefur lestarferðum innanlands verið fækkað þar sem sólin fer víst ekki vel með gamla teina. Það í bland við þann misskilning að ég hélt að við þyrftum að skipta um lest á leiðinni olli því að það tók okkur um 3 tíma að komast til Næstved. Þar mættum við svo galvaskir og náðum akkúrat að koma á svæðið í byrjun tónleikana. Aqua er ekki beint mitt uppáhald, en þau héldu uppi ágætu "sjói" og dönsku hlýrabolaguttarnir virtust skemmta sér vel. Um leið og tónleikarnir voru búnir skunduðu við af svæðinu til að komast burt á undan mannhafinu, náðum í þetta skiptið lest sem fór beint til Kaupmannahafnar og fengum okkur sushi í tilefni dagsins.

Á sunnudaginn var svo kíkt í bíó að sjá Dark Knight. Ég get ekki sagt að ég hafi fundið fyrir þessum 150 mínútum sem myndin er. Heath heitinn stóð sig frábærlega sem Jókerinn og átti stærsta þáttinn í að gera myndina svona skemmtilega. Ef þú lesandi góður hefur ekki séð myndina mæli ég með þú skundir í næsta bíó og verslir þér stóra popp og kók með.

Og á morgun tökum við svo lest til Wacken í Holsten í norður Þýskalandi, héraði sem var fyrir 150 árum eign Danakonungs. Þar ætlum við að hlýða á fagra þungarokkstóna í nokkra daga, ásamt því að öl verður þjórað. Eftir þá ferð tekur svo við u.þ.b. 5 vikna tímabil af ölbindindi, stífum ritgerðarskrifum og almennri geðveilu.

Dönsk popptónlist

2008-06-16T15:43:00.000-07:00

dæmið sjálf, en ég held að Danir hafi fengið leifarnar þegar tónlistargeninu var dreift til norrænna þjóð. Nokkur tóndæmi:

Nik & Jay

Jokeren

Magtens Korridorer

Disneyland After Dark

Burhan G

Hej Matematik

Big Fat Snake

Spleen United

Nephew

Suspekt

svo á Aqua líka heima hérna, en þið vitið hvernig það hljómar

Mér er heitt

2008-05-09T06:40:00.000-07:00

Ég sit fyrir framan tölvunni í íbúðinni okkar. Sólin skín miskunnarlaust á mig og ég svitna eins og svín meðan að ég reyni að vinna úr gögnum í Matlab. Mig grunar að ég muni ekki eiga eftir að kvarta framar yfir kuldanum á Íslandi þegar þetta sumar er á enda.

Var á fyrirlestir í gær

2008-05-09T03:09:00.000-07:00

Um lög Dana gagnvart nauðvörn. Núna veit ég að hér er Indiana Jones talsvert að fara yfir þá heimild um vald sem nauðvarnarlöggjöfin bíður upp á.

Fór í biffen

2008-05-07T03:41:00.001-07:00

Og sá Iron Man. Verð að segja að mér fannst hún nokkuð skemmtileg og held ég að það megi skrifast að mestu leyti á hann Robert Downey Jr. Honum tekst að gera skemmtilega ofurhetju sem er á sama tíma svöl en samt pínu misheppnuð. Jeff "the dude" Bridges kemur líka á óvart sem ótrúlega vondur vondikall.
Þeir sem eru jafnmikil njerðir og ég og geta spottað Tom Morello í myndinni fá öl.

Mig langar

2008-05-04T11:02:00.000-07:00

Að sjá þessa mynd. Veit ekki af hverju. Pælingin á bakvið þessa mynd hljómar bara svo illa að hún hlýtur að vera góð.

Horfði á Rambo 4 í gær

2008-04-27T04:22:00.000-07:00

80's krakkanum í mér fannst gaman að fylgjast með gamla búntinu brytja niður ógrynnin öll af vondum köllum. Kom mér á óvart að þetta var bara hin fínasti hasar. Fullkomin mynd fyrir þá sem nenna ekki að þurfa að pæla í spaklegum samtölum og vilja bara sjá fólk snýta rauðu hægri og vinstri.

Hér með staðfest

2008-04-15T10:06:00.000-07:00

Maís-tortillur eru mikið betri en hveiti-tortillur. Mjög ánægður með að Føtex búðin í nágreninu sé farinn að selja slíkt.
Gerði chilí á sunnudaginn var og prufaði að fara alla leið til Texas með það með því að gúgla mér uppskrift af kornbrauði og ég verð að segja að það er mikil snilld. Hráefnið hræódýrt, tekur innan við 10 mínútur að vippa deiginu saman, 25 mínútur í ofn og svo er maður komin með þetta fína brauð með sætu kornbragði. Gott bæði sem meðlæti með krydduðum mat eða eitt og sér með kaffinu. Hér er uppskriftin sem ég fann. Ég set þó spurningmerki við magn sykurs í henni, og set ekki nema c.a. matskeið í brauðið mitt. Finnst tæpur bolli fullmikið af hinu góða.
Ég er líka búinn að komast að því að suðurríkja chilí er einkar þægilegur sunnudagsmatur, sérstaklega þar sem nautahakk er eina hráefnið sem maður getur verið viss um að fá á sunnudögum hér í Danaveldi. Svo lengi sem maður er með hakk, chilí pipra, niðursoðna tómata og lauk, getur maður nokkurn veginn dömpað hvaða afgangsgrænmeti sem maður á eftir vikuna.

Heja Norge

2008-04-12T04:01:00.000-07:00

Um síðustu helgi var skroppið í stúdentafrí til Kristiansand í Noregi að heimsækja hana Hafdísi. Flogið var af stað til Osló með norsku ofurlággjaldaflugfélagi snemma á fimmtudagsmorgni. Í Osló beið okkar hangs á aðalbrautarstöðinni meðan að við biðum eftir að lággjaldarútan færi til Kristiansand. Eftir 5 tíma skrölt í rútunni, þar sem við sváfum mest alla leiðina, vorum við svo loks komin til Kristiansand um níuleytið um kvöldið, þar sem Hafdís beið okkar á bleiku hjóli. Versluðum í matinn og hófum fyrstu öldrykkju kvöldsins.
Daginn eftir skoðuðum við miðbæinn í Kristiansand, sem er ferkantaður, lítill og sætur. Fengum okkur kaffi og röltum svo um upp skógiþakinn hól á eyju við bæinn. Sáum þar meðal annars dádýr og fallbyssur. Eftir það var mál að drífa sig í búðirnar þar sem Norðmenn leyfa bjórsölu í búðunum, en læsa bjórkælunum klukkan sex. Fengum þá að komast að því að Noregur er örugglega eina landið sem er með dýrari bjór en Ísland :o Um kvöldið tók svo við meiri eldamennska og ölþamb með alþjóðlegum íbúum stúdentagarðanna.
Laugardagurinn fór í svipaða rútínu, meiri göngutúr í norsku skóg -og hálendi, nema núna hittum við brjálaðar endur og Sigrúnu tókst að detta niður úr tré og snúa sig.
Eftir göngutúrinn var þynnkan farinn og tími á meiri eldamennsku og öldrykkju. Svo var kíkt í partý á kollegíinu, þaðan haldið niður í bæ og svo eftirpartý í herberginu hennar Hafdísar.
Sunnudagurinn fór svo í almenna þynnku og vídeogláp.
Mánudaginn var svo haldið af stað heim til Köben snemma um morguninn. Í þetta skiptið var ekki sofið alla leiðina í rútunni, þ.a. að maður gat skoðað norskt landslag út um gluggan, sem er töluvert mikilfenglegra en það danska. Við tók svo önnur bið í Osló, en í þetta skiptið ákváðum við að rölta aðeins um miðbæ borgarinnar. Sáum t.d. vaktaskipti við konungshöllina og komumst að því að Karl Jóhann er mjög vinsæll þar á bæ. Um mánudagskvöldið voru svo þreyttir en glaðir ferðalangar komnir aftur heim á Svanevej.

Einhverjir myndir má finna hér, en svo ætti Hafdís einnig að luma á fleirum.

5 Alarm Chili

2008-03-31T02:14:00.000-07:00

Var boðið í Texas Chili Cook-off í gær. Niðurstaðan er sú að chili með 5 habanero piprum er bara nokkuð gott.

Af þungarokki og öðrum hlutum

2008-03-29T07:18:00.000-07:00

Fór á tónleika á miðvikudaginn að sjá Phil Anselmo og félaga í Down. Skemmti mér vel og náði að æfa flösuþeytingar með gott útsýni nálægt sviðinu. Phil hélt egóinu sínu í lágmarki og var skemmtileg partýstemning yfir tónleikunum.
Heimilishaldið hér er orðið háð House, þrátt fyrir sjónvarpsleysi, eða kannski vegna þess þar sem alnetið hefur verið nýtt til að horfa á 12 þætti af 4ðu seríu. Þar sem ég hafði ekkert fylgst með þessum þáttum áður þarf maður að fara að skoða eldri seríurnar líka.
Er að lesa sænska bók um templarariddarann Arn á dönsku. Búinn með 312 blaðsíður af dönsku máli um Svía.
Wacken miðarnir okkar komu í vikunni. Nú þarf maður að fara að æfa flösuþeytingar í 30 mín daglega.
Cavalera bræðurnir virðast hafa komið saman og gefið út plötu. Ætla að tjekka á því og vona að það sé eitthvað í ætt við gamla Sepultura dótið. Hér er plötudómur
Svo var ég að komast að því að hvorki Sigrún né Gaui hafa séð Blade Runner. Ég hélt að allir hefðu séð Blade Runner !

Dauði sjónvarps

2008-03-19T08:40:00.001-07:00

Sjónvarpið okkar dó í gær. Ég tók þá óskynsamlegu ákvörðun að þvælast úr rúminu um miðja nótt og fara á klósettið. Afleiðingin af því var sú að þegar ég var að staulast í myrkrinu rak ég mig í sjónvarpið sem hrundi með látum. Og núna vill ekki kvikna á því. Og verst að öllu er að fyrr um daginn fórum við í Fona og keyptum fullt af DVD til að horfa á um páskana. Svona eru örlögin stundum grátbrosleg. Eina sem maður getur gert til að lyna þjáninguna er að horfa á aulahúmor á jútúb, eins og þetta:

Powerthirst
Powerthirst 2: Re-Domination

Þungarokksharðkjarni

2008-03-06T15:15:00.000-08:00

Við Sigrún ákváðum að brjóta upp úr vananum í gær og kíkja á tónleika. Fyrir valinu varð þungarokksharðkjarni í boði The Dillinger Escape Plan og Poison The Well, en tónleikarnir voru haldnir í Pumpehuset við Studiestræde. Við byrjuðum á að komast að því að danskir eru hrifnari af því en Íslendingar að láta tónleikana byrja á tilskyldum tíma. Við mættum í sakleysi okkar 50 mín eftir að tónleikarnir áttu að hefjast, og var þá upphitunarbandið, Stolen Babies, búið og Poison The Well ný byrjaðir á sínu prógrami. En við létum ekki það á okkur fá og tróðum okkur framarlega í þvöguna og gerðum okkar besta til að njóta tónleikanna. Stillingin á míkrafóninu mvar eitthvað að stríða PtW þar sem oft heyrðist lítið sem ekkert í söngvaranum þegar hann var að syngja hreina söngkafla, og ef hann reyndi að syngja nær í míkrafóninn fór bara að koma feedback. Það lagaðist þó sem eftir leið á tónleikana og var alveg komið í lag þegar komið var að Dillinger. Þrátt fyrir þetta stóðu Poison The Well sig með ágætum, spiluðu þétt sett og kom mér skemmtilega á óvart hve vel nýju lögin nutu sín í lifandi flutningi, en ég hafði ímyndað mér að þau lög væru betur fallinn plötuforminu.
Þegar Poison the Well höfðu lokið við að spila síðustu slagarana var gengið í nauðsynleg mál eins og að koma jökkunum í fatahengið og fá sér 2 bjóra. Dillinger komu svo á svið eftir hlé með látum eins og þeim er einum lagið, með reyk, ljósadýrð og almennu brjálæði. Liðsmenn þeirra sveitir eru ekki mikið fyrir að hafa eigin heilsu í fyrirrúmi og voru duglegir að sveifla hljóðfærum, hoppa, skoppa og klifra á hátölurum. Aðalgítarleikari og lagahöfundur sveitarinnar (Ben Weinman) var einkar duglegur að vanstilla sína gítara og slíta strengi, ásamt því að berja í þá, sveifla þeim og kasta þeim um. Í öðru lagi sveitarinnar (43% Burnt) var hann t.d. strax búinn að afstrengja annan gítarinn sinn. Var því maður í vinnu við það alla tónleikana að halda gíturunum hans gangandi og þurfti nokkrum sinnum að skipta um gítar í miðju lagi. Einn monitor fékk líka að fjúka eftir að söngvarinn hafði verið að hoppa og skoppa á honum. Allt í allt voru tónleikar Dillinger stórgóðir, ný og gömul lög blönduðust vel saman, hljóðfæraleikurinn mjög þéttur (lög Dillinger eru yfirleitt frekar erfið í spilun) og sviðsframkoman til fyrirmyndar.
Keypti mér svo hvítan Poison The Well bol í safnið, smá tilbreyting frá þeim svörtu.

Til gamans lærði ég af þessum tónleikum eftirfarandi:
1. Söngvarar í þungarokksharðkjarnaböndum þurfa greinilega að lyfta mikið og vera skornir og massaðir í drasl.
2. Gítarleikararnir þurfa að taka tíma hjá íþróttaálfinum svo þeir geti tekið fimleikahopp og spilað á gítar á sama tíma.
3. Bassaleikurum er skilt að kunna að dansa með grúvinu með hökunni.

Tóndæmi og sjóndæmi:
Zombies Are Good For Your Health , fyrsta "lokalag" Poison The Well á tónleikunum

43% Burnt , annað lag Dillinger á tónleikunum.

Hún á afmæli í dag !

2008-03-02T08:35:00.000-08:00

Hún á afmæli hún Sigrún !
hún á afmæli í dag !

Svanevej Quesadilla

2008-02-27T07:25:00.000-08:00

Hráefni:

500g kjúklingur í bitum
2 paprikur, skornar í strimla
2 laukar skornir í strimla
stór dós af pinto baunum (eða nýrna eða chillý baunum)
minni dós af maísbaunum
poki af pítsaosti
poki af 4 - 6 wrap tortilla
0 - 2 chillíar (við setjum tvo)

marinering (nei, ekki Ham lagið):

1-2 lime, fer eftir stærð
væn tsk cumin (ekki kúmen)
c.a. tsk paprika
c.a. tsk kóríander
1/2 tsk chillí eða cayanne (skræfur geta sleppt eða sett minna)
1/2 tsk kanill
1/2 tsk túrmerik
smá sykur til að vega upp á móti lime safanum
salt og pipar eftir smekk

Lime kreyst til að fá safann í skál. Kryddunum hrært saman við safann og kjúklingabitunum svo vellt upp úr honum. Setjið skálina svo í ísskáp í 30+ mínútur.
Þegar kjúklingurinn er búinn að marinerast er hann snöggsteiktur á pönnu. Síðan er paprikunum og lauknum bætt við og steikt í nokkrar mínútur áður en baununum er bætt við og öllu gumsinu leyft að steikjast í nokkrar mínútur í viðbót.
Hitið aðra pönnu að meðalhita og setjið tortilla köku á hana þurra. Dreifið yfir osti, síðan gumsi, meiri osti og að lokum annarri köku. Þegar osturinn fer að bráðna ætti hann að halda gumsinu á sínum stað. Eftir 2-3 mínútur má svo snúa við. Við setjum disk ofan á pönnuna, snúum pönnunni og rennum svo kökunni aftur á. Þegar hinn hliðinn er líka orðinn steikt er hægt að nota sömu aðferð við að ná kökunni af pönnunni. Skerið kökuna í sex sneiðar og berið fram með sýrðum rjóma og salsa sósu.
Gumsið á að duga í alla vega 2 - 3 kökur.

Af buxum og buxnaleysi

2008-02-26T11:27:00.000-08:00

Ég lenti í því stuttu eftir að ég kom aftur til Danaveldis að tvær af mínum gallabuxum tóku upp á því að byrja að rifna. Aðrar rifnuðu í sundur í klofinu og eru því eiginlega algerlega ónothæfar. Hinar hafa þjónað mér í mörg ár og er komið gat á annað hnéð, eins og við hefði svo sem mátt búast. Því má hins vegar líkast til redda, eða ganga í þeim með gat á hnénu. Fræðilega á ég því 5 buxur í Danmörku, en af þeim eru einar íþróttabuxur, einar taekwondo buxur, einar með rifið klof og einar með rifið hné. Af því leiðir að í praksís slefa ég upp í tvær buxur sem ég get gengið í dags daglega. Ég fór því á stúfana að leita mér að buxum um helgina, bamm lágmark 10þús kjell fyrir mannsæmandi gallabuxum. Mér finnst það ansi hart að þurfa að selja annan fótinn til að geta keypt sér buxur fyrir daglega notkun, sérstaklega þegar maður mun bara hafa eftir einn fót til að klæða. Mesta böggið er svo að ég á hátt í 20þús króna inneign í Kringlunni sem hefði verið sniðugt að nýta ef buxurnar hefði tekið upp á því að rifna eins og viku fyrr en þær gerðu, nornirnar þrjár hlæja núna á minn kostnað. Ætli maður þurfi ekki annaðhvort að fara að læra að sauma föt eða þefa uppi útsölur og afslætti.

Leti

2008-02-21T11:23:00.000-08:00

Já, sökum leti er orðið langt síðan að ég lagði orð í belg. Febrúar er búinn að einkennast af því að það er sofið langt fram á dag og vakið allar nætur. Mastersverkefnið mitt byrjar formlega um mánaðarmótin, þ.a. ég er núna í lestímabili þar sem ég á að finna hjá mér þörf að lesa um dót sem tengist verkefninu mínu. Sjálfsagi er ekki mín sterkasta hlið þ.a. síðustu 2 vikur eða svo hafa bara verið nýttar 90% eða svo í leti.
Ég skráði mig í einn kúrs, upp áhuga vantar ekki einingar, til að halda mér við efnið, en sú áæltun hefur ekki gengið eftir þar sem ég hef heldur ekkert verið að mæta eða gera neitt þar.
Þessi vika hefur mikið farið í gestagang þar sem Hjalti vinur Sigrúnar gisti hjá okkur frá sunnudegi og fór í morgun. Gerðum túristalegt dót eins og að skoða Kronenborg slot í Helsingør og drukkum bjór. Haukur bróðir hennar Sigrúnar er svo rétt ókominn og á að kynna honum fyrir danskri aktivistamenningu.
Ég eignaðist líka nýtt gæludýr sem má sjá í þessu myndaalbúmi. Þeir sem geta fundið það fá bjór.
En betur má ef duga skal. Í næstu viku ætla ég að hrista af mér slenið, drekka kannski aðeins minni bjór, meira kaffi og gerast bókasafnsormur. Mæta líka fullt í taekwondo til að koma í veg fyrir bókasafnskrippu.
Þess má geta að við fengum leið á að borða alltaf bara hakk og kjúkling í öll mál, þ.a. við höfum ákveðið að hafa fisk eða skelfisk a.m.k. tvisvar í viku í kvöldmat og alla vega einn grænmetisrétt í viku. Hingað til hafa t.d. kjúklingabaunakarrý og bretonsk fiskisúpa verið að vekja mikla lukku.
Held ég sé búinn að rausa um allt sem mér dettur í hug :P

Stjörnuspáin mín í dag

2008-01-31T02:42:00.000-08:00

Mér finnst hún hljóma nokkuð skemmtilega:

Steingeit: Það leiðir margt gott af sér að gera ekki neitt. Gerðu því ekkert af mikilli ástríðu og krafti. Enn betra er að gera ekkert með vini.

Mér finnst

2008-01-23T04:52:00.001-08:00

Að David Hasselhoff eigi að semja næsta Bond-lag og hoff-stæla bond aðeins upp.
Devo koma reyndar einnig til greina, þó þeir geti ekki hoff-stælað (vídeóið er reyndar eitthvað crappý jútúb heimgert dæmi, en lagið kemst til skila).

Erfitt að segja

2008-01-22T01:03:00.000-08:00

Hvort sé betra, Devo, eða Weird Al að þykjast vera Devo.

Finnst mig einnig knúinn til að minnast á ábreiðu þeirra Devo manna á Are You Experienced með Jimi Hendrix.

Var ekki fleira í dag.

Langaði að skrifa eitthvað nýtt

2008-01-10T03:52:00.000-08:00

Jæja, enn eitt árið liðið með tilheyrandi látum. Árið 2007 var nokkuð viðburðarríkt og nóg var að gera. Í skólanum var nóg að gera, námið yfirleitt skemmtilegt en á báðum misserum var maður kominn nett með æluna upp í kok af vinnuálagi. Nú á ég bara eftir að fá tvær einkunnir og ef það gengur eftir er það bara verkefni og svo get ég farið að kalla mig meistara eins og þeir Björn og Óli Haukur.
Kalli og Telma giftu sig og af því tilefni var stórsveitin Blásýra kölluð aftur saman til setja punktinn yfir i-ið. Einkar ánægjulegt kvöld.
Við Sigrún byrjuðum að búa saman sem hefur einnig verið einkar ánægjulegt. Mössuðum síðari hluta ársins með fjórum flutningum á tímabilinu ágúst til desember. Höfum þar með búið í flestum hverfum Kaupmannahafnar. Svona flutningahrina er samt ekkert sem ég mæli með.
Það er örugglega fullt meira að segja um árið, en mér dettur ekkert sniðugt í augnablikinu. Langar samt að þakka öllum vinum og vandamönnum fyrir að hafa gert það svona skemmtilegt.
Markmið fyrir árið 2008 er að verða vonandi verkfræðingur, vera duglegur að æfa Taekwondo og reyna að æfa mig meira markvisst á gítar og bassa svo ég verði að betri tónlistarmanni. Sjáum svo til að ári hvort eitthvað af þessum markmiðum muni ganga upp.

Dúel nr.2

2007-12-11T02:44:00.000-08:00

Jæja, Dio rústaði fyrsta osta-einvíginu 3-0, ekki við öðru að búast. Teflum þá fram tveimur öðrum merkum þungarokksböndum. Fyrst ber af nefna þungarokksjötnana í Judas Priest:

Judas Priest: Breaking The Law

og svo til að vera í stíl við Ronnie James Dio og hljómsveitina hans Dio, höfum við Glenn Danzig með hljómsveitina sína Danzig að gera Mötorhead-stæl hryllingsmyndalög:

Danzig: Mother

Eitt er víst

2007-12-10T04:57:00.000-08:00

Og það er sú staðreynd að níundi áratugurinn gaf af sér ótrúlegt magn cheesy myndbanda, og oft jafnvel við fínustu lög. Ætla því að setja af stað nokkur einvígi þar sem þeir sem að skoða þetta blessaða blogg (allir þrír eða svo) geta valið um milli tveggja myndbanda frá tveimur hljómsveitum og gefið örðu því sitt ostaatkvæði, eitthvað svona til að drepa tímann þegar menn nenna ekki að læra í prófunum. Byrjum á:

Iron Maiden: Run To The Hills

Dio: Holy Diver

Plötur mánaðarins eru

2007-12-08T14:55:00.000-08:00

Þrjár:
Fyrst ber að nefna nýju plötu Down, III Over The Under, sem er frekar merkilegt að hafi komið út á árinu fyrir tvær sakir. Annars vegar fauk heimabær liðsmanna út í buskan þegar fellibylurinn Katrína kíkti í heimsókn, og svo var Phil Anselmo orðið lítið annað en út úr reykt taugahrúga eftir morðið á Dimebag Darrell. En þessi plata er þrusugóð og gefur eldra efni ekkert efni, grúv, þyngsl, og slímugt Suðurríkja distortion er allt enn til staðar og lögin renna vel í gegn frá upphafi til enda. Það sem kemur kannski mest á óvart er hve vel Anselmo stendur sig, líklega ekki staðið sig jafnvel síðan fyrir aldamót.
Svo eru það drengirnir í Alabama Thunderpussy sem eru komnir með sinn annan söngvara eftir að sá upprunalegi hætti. Minna stóner að þessu sinni og kapparnir farnir að spila meira hrista skanka og fá sér bjór barþungarokk og hentar það bara ansi vel. Einkar hressandi.
Svo er það að lokum Dethalbum með Dethklok. Ótrúlegt nokk mest hressandi dauðarokksplata sem ég hef heyrt í í nokkurn tíma. Sem er kannski merkilegt sérstaklega fyrir þær sakir að sveitin er í rauninni ekki til. En heilinn á bakvið teiknimyndirnir er lærður gítarleikari frá ekki ómerkilegari stofnun en Berkley College of Music og virðist hafa lært eitthvað um lagasmíðar þar. Allt í allt er þungarokkið að koma sterkt inn svona fyrir jólin.

Endalausir flutningar

2007-12-03T07:26:00.000-08:00

Jæja, þá erum við búin að flytja núna þrisvar síðan í lok ágúst. Fyrsta hollið var þá þegar íbúðin hennar Sigrúnar á Einimel var rýmd, svo þurfti að flytja úr litlu íbúðinni minni til Vanløse (Vatnleysu skv. Gaua) í lok september. Í morgun var svo loks bundið enda á þessa hrynu þegar við klukkan 07:49 vöknuðum við að bílstjórinn frá flutningþjónustunni var mættur , ruddum öllu dótinu inn í bíl, fengum far með honum til Nørrebro og svo öllu dótinu rutt út inni í Svanevej kollegi. Svo þarf bara túr í Ikea til að klára dæmið. Myndir munu vonandi birtast síðar.

Hvort kom á undan

2007-11-28T11:15:00.000-08:00

Rave eða eiturlyf ?
Góð spurning

Í dag

2007-11-07T07:03:00.000-08:00

Var erfitt að fara á fætur. Þess vegna helti ég mér upp á tvær könnur af kaffi. Núna er ég jafn eirðarlaus og ofvirkur íkorni að reyna að forrita, sem gengur hægt þar sem allt minnsta mótstreyma fer endalaust í pirrurnar á mér. Lexía dagsins er því að kaffidrykkja á sinn gullna meðalveg, eins og flest annað í lífinu reyndar. Munið það lömbin mín.

Nýja hetjan mín

2007-11-01T08:59:00.000-07:00

Kemur kvenfólki til bjargar og er með "múvin" á hreinu:
Technoviking

Kíkt á klakann

2007-10-12T09:15:00.000-07:00

Ég lendi á Íslandi í kvöld, föstudaginn 12.okt, og verð fram á mánudagsmorgun 22. okt. Hvet fólk til að vera í bandi, ef ég næ ekki að vera fyrri til í að láta heyra í mér.

Ef það eru vandamál

2007-10-03T07:13:00.000-07:00

Spyrjið þá bara Dolph:
bréfkassi 1
bréfkassi 2

Myndist

2007-10-02T10:34:00.000-07:00

Fyrst Sigrúnu mistókst að gera hlekk á myndirnar okkar ætla ég að reyna að bæta um betur:
Myndaalbúm
Sjáum hvort það virki.
Annars var ég að komast af því að bera bjórkassa er ágætis styrktaræfing, sérstaklega ef það er 50% afsláttur af þeim, 30 flöskubjórar á 78 DKK (reyndar plús pant, en það skilar sér til baka). Ágætis gulrót til að plata mann að rogast með líkast til 15 - 20 KG í korter.

Að vera veikur

2007-09-25T13:35:00.001-07:00

Sleikir hamstur !
Sérstaklega þegar maður er að fara að standa í flutningum daginn eftir, þá er massa kvef ekki að koma sterkt inn !!
Vildi bara koma því á framfæri !!!

Flytjist

2007-09-24T05:27:00.000-07:00

Við erum að fara að flytja til Vanløse eftir nokkra daga og færa okkur þannig úr 13m2 í heila 32m2. Þetta er 2,46 föld stækkun, og því eins gott að menn haldi vel á spöðunum, því annars gæti mikilmennsku -og víðáttubrjálæði tekið við. Fáum lyklana annað kvöld og munum svo að öllum líkindum fara að færa á milli "búslóðina" (sem samanstendur af rúmi, sjónvarpi, litlu Ikea borði, DVD spilara, stól, rafmagnsgítar og svo smádóti) á miðvikudaginn. Hver veit nema öllum verði svo boðið í innflutningspartý um næstu helgi !

Dagdraumar

2007-09-17T14:50:00.000-07:00

Ég væri alveg til í að geta gert svona hluti. Kannski ef ég æfi mig rosalega mikið. Samt líklega ekki.

TKD sprikl
meira sprikl
flísum fargað
15 spónaplötur mæta örlögum sínum
og ein plata til viðbótar

Myndir

2007-09-14T10:42:00.000-07:00

Eru á blogginu hennar Sigrúnar. Óþarfi að finna upp hjólið tvisvar, þ.a. þeim sem langar að sjá í pixlum hvað við höfum verið að bralla upp á síðkastið geta kíkt þangað.

Danblogg

2007-09-12T06:12:00.000-07:00

Ákvað að henda inn nokkrum orðum til að láta fólk vita að ég sé lifandi hérna í Danmörku. Sunnudaginn 3. september var flogið aftur út, og því er ég búinn að vera hérna núna í c.a. 10 daga. Við Sigrún höfum það ágætt í 13 m2 holunni okkar, eða alla vega eins gott og hægt er að gera úr þröngum kost. Miðað við biðraðirnar lítur ekki út fyrir að við séum að fara að fá stærri stúdentaíbúð fyrr en rétt fyrir jól og leitin að húsnæði til að búa í í millitíðinni hefur ekki borið árangur. Kúrsarnir 3 sem ég valdi mér byrja vel og því má búast við að síðasta misserið mitt af kúrsum verði fínt. Helst að ég nöldri yfir að í fyrsta skipti þarf ég að mæta kl 8 á morgnanna í DTU sem krefst þess að ég fari á fætur kl 06:30. Morgunúrill maður eins og ég fílar ekki beint svoleiðis. Eftir þessi jólapróf mun ég aldrei aftur þurfa að taka próf, sem er mjög gleðilegt. Ég er farinn að æfa aftur taekwondo og má finna á harðsperrunum mínum að sumarið hjá Sjóvá hefur gert mann að algjöri kartöflu. Það stendur til að bæta það ástand.
Síðasta helgi fór í frekar mikil rólegheit hjá mér þar sem ég nældi mér í einhverja sólarhringsveiki á föstudaginn og fór skjálfandi snemma í háttinn. Á laugardaginn var eldað lasagne heima hjá Gaua. Við Gaui fórum svo að hjálpa Katli að malla mohito, en það var þemakvöld á kollegíinu hans þar sem hvert herbergi í hæðinni þurfti að redda einum drykk. Svo ætluðum við Sigrún að kíkja á alþjóðkvöld á stúdentabarnum, en þegar við komum var staðurinn pakkaður ekki mikil von á að komast inn. Því var ákveðið að fara bara snemma að sofa þar sem ég var enn hálf slappur. Á sunnudaginn var svo massaður 3ja tíma menningarlegur göngutúr um kastala drottningarinnar og Kastalettið sem er gamalt danskt virki í Kaupmannahöfn frá sautjándu öld, reist til að geta betur baunað fallbyssukúlum á Svía. Göngutúrnum var svo slúttað með velskulduðum öl í Nýhöfn.

Lag dagsins í dag er með Nora

Japanir eru skrítnir

2007-08-24T03:58:00.000-07:00

Máli mínu til stuðnings hef ég þessi sönnunargögn !

Gott partýtrix

2007-08-21T02:13:00.000-07:00

Er að geta hermt eftir fólki, en þó sérstaklega Christopher Walken þar sem hann hefur þá frábæru blöndu að virka bæði ótrúlega svalur, en á sama tíma frekar klikkaður og ekki alveg í sambandi.

einn
tveir
þrír

já, já, ég er ekkert orðinn spenntur fyrir að hætta að vinna, nei ,nei ...

There are two ways to play this song

2007-08-17T07:24:00.000-07:00

There is our way, then there is their way.
Our way is faster !

The Mechanix
The Four Horsemen

Og svo algerlega óháð:

Troops Of Doom

Sumarvinnueinkenni

2007-08-17T04:01:00.000-07:00

Í dag er föstudagur, kl 11:02 um morguninn og ég er að forrita beiðni fyrir flugvátryggingu og ég er alveg að leka niður af leiðindum. Það virðist vera örlög sumarvinnu að þegar sumarið fer að klárast og maður sér fyrir endann á vinnuferlinum þetta sumarið, þá verður sumarvinnan frekar leiðinleg. Ég hef alveg verið nokkuð sáttur með vinnuna mína þetta sumarið, en nú eru allir hinir sumarstarfsmennirnir hættir og byrjaðir í skólanum og ég sit einn eftir með fastastarfsfólkinu í mínum eigin heimi að kóða c.a. það sama og hef verið kóða síðastliðna tvo mánuði. Ég væri alveg til í að slútta þessu og liggja bara í leti þar til skólinn byrjar, en maður þarf víst á peningum að halda. Þá er fátt annað í stöðunni en að þegja, vinna og fá útrás með því að hlusta á geðveiki eins og t.d. Dillinger Escape Plan og Botch á meðan maður situr á rassinum og kóðar beiðnir. Eins gott að það er að koma helgi.

Come To Daddy

Skrifstofurými

2007-07-31T02:59:00.000-07:00

Alla vega einn þáttur þeirra ágætu myndar stemmir nú við mitt vinnulíf. Þegar ég mæti á morgnanna kemst ég ekki gang fyrr en ég er búinn að vera að vafra á netinu í svona c.a. 20-30 mín og ná þannig að vakna til lífs og endurheimta grunnhæfni í tölvunotkun fyrir þann daginn. Ég vinn í hálf-kubbarými, kubbarnir eru bara hálfir á hæð. Prentarinn hérna er líka leiðinlegur, hann prentar yfirleitt alltaf með bláu Sjóvá merki efst, jafnvel þó ég segi að hann eigi að taka úr hinum bakkanum. Einstaka sinnum gerir hann það þó ekki. Virðist ekki vera nein rök á bakvið hvað hann gerir.
Þegar ég var að vafra í dag komst ég að því að gaurarnir í Mastodon voru allir c.a. 30 ára þegar þeir stofnuðu bandið, sem þýðir að ég hef enn c.a. 10 ár til að meika það með góðri samvisku. Verst að ég myndi örugglega aldrei nenna að vera atvinnumúsíkant og þurfa að hýrast í rútu megnið af árinu. Samt gaman að spila.

Sleeping Giant

Flöskudags haiku

2007-07-27T06:43:00.001-07:00

Tíminn líður hægt
Nenni ekki að vinna
Mig Langar í øl

Robin Williams og Vin Diesel spila Warhammer40.000

2007-07-26T14:27:00.000-07:00

Og þar af leiðandi er sannað það sem ég ávallt vissi, það er svalt að vera WH40k nörd. Wikipedia veit meira um málið.

Ákvað að blogga

2007-07-20T06:23:00.001-07:00

Ég hef ekkert bloggað síðan ég kláraði prófin mín í vor. Er að hugsa um að gera heiðarlega tilraun til að breyta því. Byrja kannski á að telja upp hvað hefur drifið á daga mína í sumar hingað til:

Flaug heim og byrjaði að vinna við að tölvunördast hjá Sjóvá. Gera ferlagreiningar og reyna að forrita vefsíðulausnir á asp.net og C# með misöflugum árangri.

Kom mér aldrei til að finna taekwondo yfir sumartímann, verð bara að vera þeim mun duglegri þegar ég fer aftur út Danmerkur í haust. Reyndi í staðinn að virkja til fótbolta sem gekk ágætlega til að byrja með, en hefur síðan dalað töluvert og gæti verið búið að syngja sitt síðasta.

Við Sigrún fórum í sumarbústaðarferð í boði Birnu og Einars þar sem við fjögur ásamt Kalla, Telmu og Brynhildi litlu vorum í góðu yfirlæti yfir heila helgi.

Karl Jóhann og Telma Björg gifta sig í dag og slegið verður til veislu (aldarinnar ?) þar sem mikið verður um veigar, tjútt og klassísk uppstilling Blásýru kemur saman í fyrsta skipti í nokkurn tíma til að sjá til þess að þakið rifni af öllum nærliggjandi húsþökum.

Skráði mig í kúrsa. Er að fara að læra um magnara, hljóðnema, mp3, sjálfvirk stýrikerfi og tölvuleiki.

Lærði að spila Twilight Imperium, borðaspil sem hefur verið að koma alveg einstaklega sterkt inn hjá mér.

Keypti flug til Danmerkur, fer sunnudaginn 2. sept.

Hin og þessi partý og almenn öldrykkja.

Dettur ekkert fleiri merkilegt í hug í augnablikinu ...

Búinn í prófum !

2007-05-23T06:55:00.000-07:00

Kláraði síðasta prófið af þremur í gær.
Niðurstaða próftíðarinnar að þessu sinni eru tvö stykki 10 og ein 8.
Á flug eftir nokkra tíma og er á leið heim yfir sumarið
Gleði !

Tvö búin, eitt eftir

2007-05-16T08:40:00.000-07:00

Jæja, þá hefur munnlega prófi nr.2 verið slátrað og niðurstaðan 8 á danska skalanum og 10 auka ETC einingar í bankann minn. Hefði alveg verið til í einum meira þar sem ansi mikil vinna fór í kúrsinn, en ég kvarta ekki, alla vega ekki mikið. Ef allt gengur svo eins og það á að ganga næsta þriðjudag verð ég formlega hálfnaður með meistaranámið mitt. Og eftir viku kem ég svo heim. Þá vantar mig sjálfboðalið til að drekka ótrúlega mikið af bjór með mér og mála bæinn skærrauðan. Svo þarf maður bara að reyna að vera duglegur í sumar að æfa taekwondo, bandý og fótbolta til að vega upp á móti væntanlegu ölþambi :D

1 down, 2 to go

2007-05-10T05:43:00.000-07:00

Jæja, þá er lokið viku námskeyrslu og heilsdagsprófi í kúrsinum From Biology To Technical Neural Systems. Í fyrsta skipti sem ég hef farið í svona próf. Við þurftum að velja okkur grein úr safni af efnum sem okkur fannst spennandi og undirbúa síðan fyrirlestur og kynningu á plakkati sem við áttum að gera. Eftir viku undirbúning var svo próf í gær, fyrirlestrahrina fyrir hádegi sem allir þurftu að vera viðstaddir, og svo munnleg kynning á plakkatinu og prófað úr skylningi okkar á efninu eftir hádegi. Ég get ekki sagt að fyrirlesturinn hafi verið sá besti sem ég hef flutt, hef gert eitthvað minna af því að halda svona power point fyrirlestra og ég virðist ekki alveg vera að fatta að láta glærurnar vinna með mér þannig að ég vill vaða of hratt yfir efnið án þess að koma nógu góðum útskýringum til skila. En jæja, svo tók við tæp 6 tíma bið, þar sem ég var síðastur inn í munnlega prófið. Það tókst hins vegar mun betur og mér tókst greinilega að kæta Þjóðverjana. Niðurstaðan 10 ETC einingar í bankann og 10 á danska skalanum í einkunnabókina. Þá er bara að fara að reyna að koma sér í gír fyrir næsta próf, sem er líka á miðvikudegi, Auditory Signal Processing and Perception

Lag dagsins í dag er 'Eatin Dust með stónerkempunum í Fu Manchu, sem ég er að fara að sjá á Loppen í Kristjaníu á föstudaginn kemur. Stundum eru jól tvisvar á ári :D

Einn ég sit og læri

2007-05-01T12:21:00.000-07:00

Í dag er ég búinn að vera heima í allan dag og læra, fyrir utan 30 mín þegar ég fór út að skokka til að viðhalda geðheilsu og vöðvanotkun. En það hefur ekki gengið þrautalaust fyrir sig. Í dag er 1. maí og halda Danir hann hátíðlegan eins og við, nema þeir fá sér bjór líka. Því fékk upp úr hádegi sms frá Guðjóni og símhringinu frá Katli þar sem átti að draga mann niður í bæ að skoða skrúðgönguna og fá sér öl. Þar sem ég sá fram að þá myndi ég nú læra eitthvað minna neyddist ég til að segja nei við því. Svo ætlaði ég að fara að sjá Björn syngja með stöku en þar sem ég var ekki á áætlun með nám dagsins verður það víst að bíða betri tíma. Svo reyndi Guðjón að fá mig til að horfa á hörkuleiki í meistaradeildinni yfir öli, þ.a. það er stöðugt áreiti á einbeitinguna. En mér til (ó)ánægju tókst mér að forðast freistingarnar. Kannski ég leyfi mér að fá 1 - 2 fría bjóra á bjórkvöldi FÍVDTU á fimmtudagskvöldinu eftir æfingu. Kannski ég bara hætti að röfla og haldi áfram að læra.

Lag dagsins er Frequency Ass Bandit með Botch

Kúplingin og Sverðið

2007-04-30T13:59:00.000-07:00

Í gær skellti ég mér á rokktonleika á The Rock sem er staðsettur á Skindergade, við hliðina á Strikinu, getur hýst 600 manns og er með "happy hour" milli 01:00 og 02:00 fimmtudaga til laugardaga, að sjá blúsaða stónerrokkbandið Clutch, ásamt upphitun frá AD&D nördametalbandinu The Sword. Samkvæmt auglýstri dagskrá áttu herlegheitin að hefjast klukkan 20:00, en á þeim tímapunkti stóð ég í röð fyrir utan staðinn og þurfti að vera þar til u.þ.b. 20 mínútur í 21:00. Þá gat ég fengið mér öl, beðið eftir Sverðinu og skoðað Orange magnarana þeirra sem loguðu á sviðinu og gáfu til kynna hráann og öflugan 70's lampamátt. Strákarnir í sverðinu voru með þétta og góða spilamennsku, en eitthvað minna var um sviðsframkomu. Hefði þannig í raun geta verið heima hjá mér með öl að hlusta á diskinn þeirra í botni í gegnum góðar lampagræjur. En ég á ekki neinar almennilegar græjur svo ég kvarta ekki, ekki of mikið alla vega. Nördametalinn þeirra kom manni alla vega í ágætis gír fyrir það sem var í vændum. Svo var bjórpása meðan Orange mögnurunum var komið af sviðinu, Hammond orgelinu komið fyrir, gömlu Marshall JCM800 magnararnir hitaðir, Ampeg stæðan gerð klár og söngkerfið stillt. Clutch mættu svo á sviðið eldhressir og byrjuðu að reita af sér grúvslagar af nýjustu plötunni sinni hvern á fætur öðrum af miklum móð, með söngvarann Neil Fallon í broddi fylkingar að skoppa um sviðið eins og brjálaður farandsprestur og skartandi öflugu alskeggi sem gat ekki annað en krafist athygli. Þrátt fyrir mikinn móð ákvað rafmagnið að fara af sviðinu og var því stutt bjórpása meðan því var kippt í liðinni. Tækifærið var þá nýtt til að væta kverkar áður en gaman hófst aftur með aðeins, en bara aðeins, rólegri lögum með nokkuð af lengdum djammköflum. Söngvarinn smellti svo rótaranum á gítar og keyrslan aftur sett í gang. Held að þessir tónleikar hafi haft eitt það mest smitandi grúv sem ég hafi komist í tæri við og var ansi hreint erfitt að hrista ekki skanka. Ég fór alla vega heim sæll og glaður eftir hressa rokktónleika, vopnaður nýjum bol með hressu bensínstöðvalegu Clutch merki á.

Clutch - The Devil & Me

The Sword - Iron Swan

Ég er með pínu furðulegan tónlistarsmekk

2007-04-28T09:50:00.000-07:00

Mér finnst þetta skemmtilegt.

En þetta líka.

Spurning hvernig maður útskýrir það :P

Og þá kom blogg

2007-04-24T13:32:00.000-07:00

Ekki skrifað hérna í heilan mánuð. En nú skal gera bót úr því !
Síðast hafði ég fengið gula beltið. Síðan þá hefur eftirfarandi gerst:

1. fór heim í páskafrí sem var einstaklega skemmtilegt. Hitti kærustuna, vinina, fjölskyldu og hund. Hélt skemmtilegt teiti og spilaði spil, bandý og fleira skemmtilegt.

2. Þurfti að fara aftur út til Danmerkur þann 11. apríl, nema núna kom Sigrún með daginn eftir. Fékk gefins gamalt sjónvarp sem var reitt á milli stúdentagarða á hjóli. Sigrún kom svo með gamlan DVD spilara með sér sem hún fékk gefins. Í tilefni þess var kíkt í Fona og keyptar DVD myndir á tilboði. Lært og svo lært aðeins meira. Náði mér svo í kvef stuttu áður en Sigrún þurfti að fljúga heim. Fékk því að njóta þess einn að vera kvefaður, en það er nokkurn veginn farið núna.

Ekki merkilegt á pappír, en samt töluvert skemmtilegri mánuður en orðin gefa til kynna. Grunar að næstu 30 dagar verði ekki alveg jafn hressir þar sem prófatíð er að ganga í garð, en hún er einmitt leiðinlegast tíð ársins og kemur því miður tvisvar. Eftir hana verður svo reyndar stanslaust stuð í 3 mánuði :D

Apkoobi Arae-makki Naeryo-chagi

2007-03-26T14:02:00.000-07:00

Ég er kominn með gula beltið í Taekwondo, sem jafngildir 8unda kup. Byrjar með 10unda kup og vinnur þig upp í 1st kup, sem er rautt belti með 3 svörtum röndum. Eftir það er hægt að fá svart belti og safna sér dan gráðum. Við Björn mössuðum að vakna eldsnemma á sunnudagsmorgni til að mæta í próf, þrátt fyrir að klukkutími hefði verið rændur af okkur í nafni sumartíma. Nú á ég lágar beltagráður í þremur asískum bardagaíþróttum, en fyrir hef ég nokkrar neðrigráður í jiu jitsu og karate. Nú er spurning hvort maður haldist í þessu og eignist svart belti, eða haldi áfram að safna neðri gráðum úr fleiri bardagalistum. Væri gaman að verða ógurlega góður í einhverju einhvern tíman á ævinni. Virðist geta orðið mellufær í flestu sem ég tek mér fyrir hendur, en maður er aldrei með þeim bestu. Eitthvað til að stefna að. En kannski er það ofmikið vesen. Ætli það sé ekki meira gaman hjá okkur B-fólkinu.
Þeim sem langar að ljá skoðun sína á málinu er frjálst að gera svo. Eitthvað minna samt verið um það síðustu daga.

Lag dagsins í dag er:
Unstich Your Mouth
með Sparta

Þórir mælir með

2007-03-22T15:48:00.000-07:00

Quicksand og Rites of Spring.

Quicksand voru þungarokkspönkara sem voru starfandi á fyrri hluta tíunda áratugarins. Gáfu út tvær breiðskífur, Slip árið 1993 og Manic Compression árið 1995. Hljóma svolítið eins og ef Tool væri pönkrokkband. Eðal stöff sem hefur klifrað hratt upp metorðastigan hjá mér síðan ég varð var við tilveru þeirra fyrir ekkert svo löngu síðan.

Rites Of Spring er pönkrokkband sem voru aktívir um miðjan níunda áratuginn, eða 1984 - 1986 og gáfu út eina plötu samnefnda sveitinni. Hún var svo endurútgefin árið 1991 undir nafninu End On End. Uppgötvaði þessa tappa fyrir nokkrum dögum og hefur verið að meltast vel hjá mér. Eru víst titlaðir sem fyrsta formlega emo bandið, þar sem textarnir eru yfirleitt frekar bituri og söngvarinn duglegur að gera sig hásan. Er þó að mínu mati laust við allt væl í söngnum sem vill einkenna nútíma emo.

Quicksand á Wikipedíu
Rites of Spring á Wikipedíu

Quicksand - Thorn In My Side
Quicksand - Lie And Wait
Rites Of Spring - For Want Of

Dugnaður verðlaunist

2007-03-21T12:28:00.000-07:00

Já, já, strax farið að borga sig að mæta á bókasafnið. Maður klárar að gera sinn hluta í skýrslu, og þá er bara fagkynning í gangi á safninu. Verið að gefa bjór og smárétti á hlaðborði. Alltaf gott að geta skolað niður erfiði dagsins með eins og þremur flöskum af bjór !

Faktum !

2007-03-20T14:09:00.000-07:00

Að fara niður á bókasafn CBS (Copenhagen Buissnes School) eykur einbeitingu og afköst á hvern mældan klukkutíma, miðað við að sitja heima og læra. Einnig skemmir ekki fyrir að geta fengið félagsskap Guðjóns nokkurns Emilssonar í kaffipásunum. Því er nýtt plan á dagskrá: fara á bókasafnið þegar maður ætlar að læra heima. Reyna að ná smá skipulagi á námstilveru mína og gera minna af því að vera vinna á köflum langt fram á nótt. Sjáum hvernig það gengur þar sem ég hef ekki verið neitt sérstaklega skipulagður síðustu 25 ár eða svo.

Heilræði

2007-03-14T06:02:00.000-07:00

Ef þið ætlið að vakna snemma og vera dugleg, þá er ekki bara nóg að stilla vekjaraklukkuna, það þarf að setja hana í gang líka !
Meira kaffi handa mér ...

Mér finnst Henry Rollins fyndinn

2007-03-13T16:13:00.000-07:00

Kappinn að gera góðfúslegt grín af William Shatner. Njótið vel:

"hluti I"
"hluti II"

Ég vil að helgar séu 3 dagar

2007-03-13T14:31:00.000-07:00

Þar sem það er full mikið að gera hjá mér þessa dagana í skólanum. Stoppar mig þó ekki að taka eina og eina helgi frá í annað en nám (hvort ég hafi efni á slíku er annað mál). Til dæmis var farið og rokkað á árshátíð þann 24 febrúar. Það var mjög gaman. Afrakstur þess að spreyja hárið fjólublátt og bleikt má sjá hér. En þar sem að redda öllu fyrir rokkið á árshátíðinni tók mikið af tíma fengum við Sigrún ekki mörg tækifæri til að slaka á saman þá helgina áður en ég þurfti að snúa aftur til Danmerkur. Hún kom því í heimsókn síðasta miðvikudag og mætti ég upp úr hádegi að sækja hana á Kastrup. Ýmislegt skemmtilegt var brallað til mánudags. Kíktum í bíó að sjá Blood Diamond og fengum ansi stórt popp og kók. Röltum eina gönguleið um borgina , úr gönguleiðabókinni minni, í smá rigningu með honum Birni Önundi. Borðuðum svo veislumat á steikhúsinu hans Jensen og kíktum á jazztónleika. Kíktum með Gaua í bæinn og versluðum fullt af framandi kryddum og grænmeti í tælenskri kjörbúð, ásamt viðkomu á bar. Og viðkomu á bensínstöð þar sem 2 kassar af tuborg fengust á u.þ.b. 2616 krónur. Gerðum úr þessu tælenskan veislumat og sötruðum öl fram á nótt. Einnig var kíkt á kaffihús, legið í leti, spjallað um norræna goðafræði og annað sem ekki er hægt að prenta hér af virðingu við viðkvæmar sálir. Í gær var svo gamanið úti. Í hlýrri vorsól, sem ákvað að láta sjá sig og hefja vorið á furðulegum tíma, var farið út á Kastrup þar sem ég kvaddi Sigrúnu. Veruleikinn ákvað að taka við og sparka í rassinn á mér í sólinni. Við tók verklegt og tae kwon do. Annað var töluvert ánægjulegra en hitt.

Nöldrist

2007-03-04T11:59:00.000-08:00

Mér leiðist þessa dagana. Mikið af skýrslum, mikið að kóða stærðfræði forrit. Lítið að gera annað. Kíkti reyndar á bíó með Birni í gær að sjá Last King of Scotland. Hún var ansi hreint góð. En að staðaldri eru samskipti mín við annað fólk eitthvað í minna lagi miðað við það sem hefur verið vaninn hjá mér undanfarin ár. Óli fluttur heim, Gaui upptekinn við uppeldi, Sigrún og vinaskarinn heima á Íslandi. En kannski á maður ekki að vera að nöldra. Sigrún kemur alla vega í heimsókn næsta miðvikudag. Gott páskafrí 30 mars, sem ég stefni á að reyna nýta vel. Jafnvel halda partý föstudaginn langa eða eitthvað þess háttar. Þarf að fara að spila tölvuleiki aftur, sökkva mér í nördaáhugamálin mín eða eitthvað svoleiðis.

I Only Dream In Black & White

2007-02-21T17:41:00.000-08:00

Er fleyg setning úr Iron Maiden slagara. Mig dreymir vanalega aldrei neitt þannig að ég muni sérstaklega eftir. En það hefur hins vegar gerst núna tvisvar undanfarið. Líklega bæði út af röskun á svefn snemma um morgun, annars vegar á mánudaginn þegar einhverjir fóru að bora á ansi hreint kristilegum tíma. Og svo núna miðvikudagsmorgun þegar eldsnemma var einhver vinnuvél að skemmta sér fyrir utan. Bæði skiptin rumskað ég einstaklega pirraður, náði svo að sofna aftur og fékk svo þessa steiktu drauma.

Nr.1
Ég var kominn heim í árshátíðarpásuna. Nema hvað að kokkurinn hafði beilað og ég var beðinn um að elda eitthvað, karrý minnir mig. Þ.a. ég var á fullu spani að æfa fyrir ballið og reyna að redda hráefni í mat. Nema þegar ég var að elda skemmdi einhver matinn og henti honum öllum. Ég fór þá eitthvert út á land að reyna að redda nýju hráefni fyrir veislumatinn, en festist þar af einhverri einkar furðulegri ástæðu, og komst ekkert heim aftur fyrr en seint á sunnudagskvöldinu. Svo vaknaði ég.

Nr.2
Einhverja hluta vegna voru Aerosmith mættir í heimsókn heima úti á nesi. Ekki veit ég af hverju, þar sem ég hlusta ekki beint mikið á Aerosmith að staðaldri. En þarna voru þeir, og við að horfa á einhver steikt og útúrreykt tónlistarmyndbönd við Blue Oyster Cult lög. Svo átti bróðir minn eitthvert safn af Aerosmith tónleikum á VHS og við vorum að spóla í gegnum það að reyna finna einhvern brandara sem Steve Tyler hélt að hann hefði sagt á sviði. Svo vaknaði ég.

Nú geta fróðir menn spreytt sig á að ráða þessa steypu. Eða kannski ekki. Eflaust ekki gott fyrir geðheilsuna ykkar :D

Tíðindalaust á dönsku vígstöðvunum

2007-02-18T06:59:00.000-08:00

Í gær var laugardagur. Daginn áður höfðum við Ketill sótt heim hann Guðjón til að gefa nýbakaðri stúlkunni bangsalegasta bangsa sem við gátum fundið í dótabúðunum (sú leit krafðist 2ja öla), og nýbökuðum föður smá öl. Áttum því ansi hresst og notalegt kvöld þar sem var spjallað við tengdaforeldra Guðjóns, sem voru í heimsókn, borðaðar flødeboller, horft á grínþætti í sjónvarpinu og fengið sér að lokum einn öl á kollegí barnum, sem reyndist reyndar vera stappaður af sótölvuðum Íslendingum sem höfðu verið að spila póker.
Í gær ætlaði ég að vera duglegur og læra. En ég hafði ekki gert ráð fyrir að á allri hæðinni fyrir ofan væri fastelavnsfest (öskudagspartý held ég) og stundvíslega klukkan 22:00 fóru græjurnar í gang og ég var með popp og diskó á fullum styrk inni í herberginu mínu til 06:00 um morguninn. Eina leiðin til að losna við tónlistina og halda sönsum var að setja á mig heyrnatól og spila mitt harðasta pönk -og þungarokk til að yfirgnæfa hinn hávaðan. Þetta olli því að mér tókst aðeins að gera þann kóða í verkefninu sem ég var að vinna að sem krafðist sem minnstrar hugsunar. Lítið svigrúm til einbeitingar. Vona að það sem ég gerði meðan ég hélt enn sönsum muni nýtast eitthvað. Reyndi að brúka eyrnatappa, en það dugði ekki til. Náði svo loks að sofna einhver tíman milli 6 og 7 í morgun. Enda er dagurinn fyrst að komast af viti í gang núna um fjögurleytið.
Annars er líka frá því að segja að Sigrún hefur haldið áfram tilraunum sínum með að lita einstaklega ljósa hárið sitt. Í þetta sinn voru það þjóðfræðinemar sem kvöttu hana til að lita það bleikt til að vekja athygli á málstað þeirra. Afraksturinn má sjá hér:

Vill sérstaklega benda á hvað Sigrún er ánægð með að fá að hafa vaknað þarna snemma eftir að hafa verið eina manneskjan sem var ölvuð, eftir vísindaferð, að spila trivial við 3 edrú njerði nóttina áður. Gleðin skín úr augum hennar. Þessi litagleði hefur líka ollið því að Sigrún er búin að heimta að fá að ráðast á hárið á mér áður en stigið verður á svið á árshátíðinni. Vopnuð hinum ýmsu litum og hárvörum ætlar hún að umbreyta hárinu mínu í nafni jafnréttis. Hvort það mun koma til með að vera rokk eða slys mun koma í ljós (verður líklegast bæði:P). En sama hvernig það fer, þá verður alveg rosalega gaman þá ! Þeim sem langar að mæta, djamma með mér og sjá mig rokka er vinsamlegast bent á að kíkja á spjallsvæði Háskólakórsins.

Gleðileg helgi, langur mánudagur.

2007-02-12T10:52:00.000-08:00

Nú á fimmtudaginn kíktu Birna og Einar til Danmerkur og lentu ca. kl 20:00 þar sem ég tók á móti þeim með móttökuskilti og bjór. Það kvöldið fór mest megnis að finna gistipláss þeirra í úthverfi sem heitir Brønshøj, sem tókst að lokum eftir langa strætóferð og mikinn þvæling um hlaðin hús sem litu öll eins út og vöru öll með limgerði. Skóli og verklegt á föstudeginum komu í veg fyrir meiri öflugheit það kvöldið.
Á föstudeginum var svo hitt á Einar niðri í bæ og þaðan farið að versla í matinn. Planið að gera indverskt kjúklingakarrý. Það gekk ekki alveg þrautalaust fyrir sig og þurfti að grípa til ýmissa björgunaraðgerða eins og að skera með dúkahníf, brúka álpappír sem lok og krydda vel með svörtum pipar, eitt af þremur kryddum sem var til á heimilinu, eftir að í ljós kom að tjillíið sem vioð keyptum reyndist vera meira paprikusalt en tjillí. Matnum tókst einhvern veginn að vera ætur, þó þetta hafi ekki beint verið besta karrý sem ég hef gert. Bæði ég og Einar höfðum ekki fattað að borða meira en 3 banana hvor yfir daginn og drekka ósköpin öll af kaffi, svo hvaða matur sem er var vel þeginn. Svo var skemmt sér vel yfir drykkjuleikjum, söngli, kassagítarspili og bæjarferð.
Laugardagurinn var svo nýttur í að kíkja á elstu krá Kaupmannahafnar, Hvidts Vinstue, fá sér sushi á Sticks 'N Sushi á Istergade og skemmta sér meira. Jafnvel of mikið. Ég var alla vega kominn í leiðinlega röflgírinn undir það síðasta. Kannski ekki sniðugur leikur að kaupa Tuborg Gold í búðinni, sem reyndist vera 5.8%
Í þynnkumóki var svo kíkt á nýfædda Gaujadóttur á sunnudeginum. Þaðan var svo kíkt til Kristjaníu að fá sér kvöldmat á Spise Loppen. Maturinn þar töluvert betri en útlitið á staðnum gefur til kynna. Svo var sælan bara úti.
Píndi sjálfan mig á fætur í morgun og dreif mig skólann. Komst þá að því að Torben úr Acoustic Communications frá því fyrir áramót var með gestafyrirlestur um heyrnarskaða, allt dót sem kunni, þ.a. ég hefði alveg getað leyft mér að sofa út. Eftir hádegi tók svo við áframhaldandi vinna í verklegu. Svo skriðið heim rétt eftir sjö með sjoppulega tyrkjapítsu og nettan hausverk eftir langan vinnudag.
We work hard. We play hard.

Til hamingju !

2007-02-07T12:32:00.000-08:00

Ætla bara að nýta tækifærið til að óska eftir farandi fólki til hamingju:

Gauji og Kristín fá hamingjuóskir hér á netgarði fyrir að hafa fjölgað mannkyninu um einn einstakling. Verður gaman að fá að sjá hana og fylgjast með hvernig Gauja á eftir að farnast í föðurhlutverkinu.

Telma fær líka hamingjuóskir fyrir þann merka árangur að hafa elst um sem nemur einu ári og er því formlega 23 ára í dag. Vona að hún hafi átt góðan afmælisdag.

Fleira var það ekki í bili.

Gyllt eða fjólublátt ?

2007-02-04T04:23:00.001-08:00

Í gær var kórinn með þemapartý. Þemað var liturinn fjólublár. Mig langaði reyndar slatta til að fara, en þar sem eitt stykki rúmhaf og töluvert margir kílómetrar voru á milli mín og partýsins var það ekki alveg í myndinni. Ég kíkti því í heimsókn til Guðjóns, sem er enn að bíða eftir að barnið sitt nenni á fætur og inn í heiminn, og við tókum lítið Austin Powers maraþon með tilheyrandi ølsötri. Sigrún tók þetta hins vegar með trompi og var nógu fjólublá til að dekka okkur bæði, enda var hún valin fjólubláust af öllum. Kom mér meira að segja skemmtilega á óvart hvað fjólubláa lúkkið var að koma sterkt inn. Hér kemur því smá fyrir og eftir svo fólk fái hugmyndir um hvaða áhrif það hefur að vera með fjólublátt hár.

ljóshærð prinsessa:

fjólublár pönkari:

Aftur í baunalandið

2007-01-30T16:30:00.000-08:00

Já, nú er maður aftur kominn til Danmerkur, mér til gleði og sorgar. Ég var orðinn svolítið þreyttur á aðgerðarleysinu heima, þ.a. það er fínt að vera kominn í skólann aftur. Mér líst vel á kúrsana og þó ég búist við mikill vinnu frá þeim, þá held ég að skólaönnin verði skemmtileg. Hins vegar er leiðinlegra að skilja eftir heima fjölskyldu, vini og kærustu. Maður var farinn að sakna þeirra strax frá fyrsta degi. Og svo tapaði Ísland naumlega fyrir Dönum, er niðurbrotinn maður þessa stundina. Lífið er súrt og sætt þessa dagana. Langar í tæki eins og Star Trek svo ég geti ferðast fram og til baka án nokkurar fyrirhafnar.

Rokkað með Rúna Júl

2007-01-17T05:26:00.000-08:00

Já, nú er heimsfrægðin bara á næsta leiti. Kallinn búinn að stíga upp á svið og rokka með Rúna Júl, reyndar í auglýsingu sem mun vekja upp mikinn bjánahlátur hjá öllum sem þekkja mig og með gítar sem er safngripur og virkar ekki. En það er ekki það sem gildir, heldur svaðalegir taktar mínir við hlið Keflavíkurkempunar goðsagnakenndu, eða eitthvað þannig. Og hann gaf mér plötu. Heimurinn mun liggja sigraður að fótum mínum.

Einu sinn var til sjöundi áratugur

2007-01-11T16:57:00.000-08:00

og þá voru Cream til. Örugglega eitt best spilandi band sem til hefur verið. Hefði alveg verið til í að sjá þá á tónleikum.

Mér finnst líka alltaf gaman þegar einhverjir gera grín að Pantera. Sérstaklega Phil Anselmo. Pantera voru samt skíturinn '94.

Veit hvað ég ætla að gera þegar ég verð gamall

2007-01-11T06:22:00.000-08:00

Ganga í ellikór

Hvar er Þórir ?

2007-01-08T07:56:00.001-08:00

Þeir sem geta fundið mig fá kannski bjór ;)

Búinn í prófum !

2006-12-21T06:13:00.000-08:00

Fokk já, tími fyrir djamm og skemmtilegheit. Ekki aftur próf fyrr en í maí

Nenni ekki að vera í prófum

2006-12-19T11:39:00.000-08:00

Svo lítið eftir, en samt svo mikið. Mikið verð ég glaður þegar síðasta prófið er á enda á fimmtudaginn, alveg með æluna upp í kok af þessu. Hata próf. En svo er bara gleði og jól og dót.

Anað út í óvissuna

2006-12-11T14:53:00.000-08:00

Eftir 9 tíma fer ég í mitt fyrsta próf af fjórum fyrir jólin. Það vill svo skemmtilega til að þetta er munnlegt próf þar sem ég dreg eitt efni af 8 og á svo að segja frá kunnáttu minni í þeim hluta efnisins. Verður spes, hef alla vega aldrei þurft að gera þetta áður í vísindafagi, bara í íslensku þar sem maður átti að greina ljóð og svo segja frá sumarvinnunni á þýsku og ensku. Sjáum hvort það komi ekki eitthvað sniðugt út úr þessu. Ég verð alla vega SVONA kátur þegar prófin eru búinn 21sta og ég get kíkt heim í jólagleðina.

Múhameð fer til fjallsins

2006-12-09T10:41:00.000-08:00

Já, nú er kjallinn bara loksins kominn í eigið húsnæði í Danmörku eftir að hafa verið formlega skráður í landinu í 3 mánuði. Kominn í einstaklings "íbúð" sem innheldur 13m2 svefn -og vinnuherbergi sem inniheldur rúm og skrifborð, baðherbergi og forstofu með 2 skápum. Íbúðin inniheldur líka lúxus eins og lítinn vegg á gólfin á baðherberginu sem aðskilur sturtuna og klósettið og kemur þannig í veg fyrir að vatnið flæði yfir allt baðherbergið. Slíkur lúxus er vandfundinn í Danmörku. Annar lúxus er svalir sem ég get lokað fyrir með glæru plasti. Gefur möguleika eins og að opna svalahurðina til að lofta út. Geyma úti drykki eins og sódavatn, kók og bjór meðan sæmilega kalt er í veðri og geyma þvottagrind. Síðan hef ég aðganga að sameiginlegu elhúsi þar sem ég hef afnot af ýmsum eldhúsáhöldum, boxi til að geyma dót, eina hillu og box í ísskáp, box í botninum á frystikistu og litlum skáp.
En ég er að hugsa um að fara að laga mér kaffi og læra eitthvað. Dagurinn í gær fór að bera drasl, flytja, og hjálpa Gaua að flytja. Dagurinn í dag mest megnis að skrúfa saman borð, stól, lampa, kaupa lengri netsnúru svo borðið gæti verið nálægt glugganum og millifæra mat í ísskápinn. Próf á þriðjudaginn. Gleði framundan.

Warning ! Boredom ahead !

2006-12-04T13:06:00.000-08:00

Já, ég er ekki frá því að síðast liðnar og nærliggjandi vikur sé- með leiðinlegri tímabilum ævi minnar. Prófstressið farið að segja aðeins til sín og lítið gert annað en grunn líkamsþarfir, skokka þegar ég þarfnast hreyfingar og læra. Samskipti við annað fólk á mjög lágu stigi. Tilveran komin í rútínu af leiðindum. Skammdegið hérna í Danmörku er verra en heima. Þeir hafa kannski 2 auka klukkutíma af sólarljósi, en sökum rakans er alltaf blautt. Það gerir það að verkum allt er grámyglað sama hvaða tíma dags það er. Klukkan 16:00 er svo komið myrkur, almennilegt myrkur. Þeir eru ekkert mikið fyrir að lýsa meira en þeir þurfa nauðsynlega. Þannig að dagurinn byrjar á myrkri, þróast yfir í grámyglu og svo aftur í myrkur.
Ég er líka búinn að komast að því að ég er ekkert voða lega gott efni í piparsvein. Ég er kominn með algjöran viðbjóð að vera borða afganga sem 2/3 af kvöldmáltíðum mínum. Og svo pítsa þegar ég nenni ekki að elda. Kominn með nett ógeð á pítsum. Á föstudaginn mun ég svo flytja úr litlu húsnæði í minna húsnæði. Mikil gleði framundan.
Þeim sem langar að taka þátt í grámyglunni með mér geta kíkt á þetta vídeó með My Dying Bride. Fengu greininlega ekki að hafa það 12 mín langt eins og lagið er, en þetta ætti að duga til að koma hverjum sem er í grámyglustuð.

My Dying Bride- Cry of Mankind

Þegar maður á að vera að læra

2006-11-30T14:18:00.000-08:00

þá finnur maður sér alltaf eitthvað "betra" að gera. Alla vega þegar maður er að reyna að læra 'Desing and Analysis of Experiments' sem er ansi hreint leiðinlegur kúrs sem ég slysaðist til að taka um almenna tilrauna -og líkindaþekkingu. Fer að geispa bara við að horfa á bókina, sama í hvaða líkamlega ástandi ég er og hvað ég er búinn að drekka mikið kaffi.
Alla vega, þá eiga víst að vera 74 bönd á myndinni. Ég er búinn að finna nokkur, en ætla að sjá hvað aðrir eru sniðugir. Get ég glaðst yfir að vera ekki einn um að vera svona einbeitingarlaus í augnablikinu :D

Vísindi efla alla dáð

2006-11-29T10:38:00.000-08:00

Incubus voru að gefa út nýja plötu sem ber nafnið Light Grenades. Þetta er band sem ég hef lengi átt í ástar/hatur sambandi við. Þeir drengir gáfu út hin stórskemmtilegu S.I.E.N.C.E. árið 1997 og hefur hún lengi verið í miklu uppáhaldi hjá mér. En eftir útgáfu hennar hafa þeir smá saman dregið úr öllu sem gerðu hana svona skemmtilega, blanda af þungum gítarriffum og fönki, og fyllt upp í staðinn með poppi. Það fer því alltaf í taugarnar á mér þegar ég heyri nýja plötu með þeim hve langt þeir hafa fjarlægst það sem þeir voru að gera á S.I.E.N.C.E. , hlusta á þær einu sinni tvisvar og gef þær upp á bátinn. En svo gerist það alltaf að ég hlusta á þær aftur og gef þeim annan séns og læt smitast af meðalmennsku poppkrókunum. Gerðist alla vega með Morning View og Crow Left of the Murder. Sjáum hvernig þessi mun meltast hjá mér, hvort ég muni taka hana í sátt, eða endanlega gefast upp á Incubus. Ég get þá bara haldið áfram að hlusta á The Sword.
Annars eru 14 dagar í fyrsta próf hjá mér.
En það eru einnig 26 dagar til jóla.
Og það sem betra er að það eru 23 dagar þangað ég til ég get hætt að húka einn og yfirgefinn í herbergiskitru með kaffi að læra. Þá get ég komið heim og glaðst með vinum og vandamönnum í ca. 5 vikur. Eitthvað til að hlakka til í skammdeginu hérna í Køben.

Phil Anselmo , eins ágætur söngvari og hanner, er ekki alveg með allar skrúfur hertar held ég :)

Sveitt og gott tuddarokk

2006-11-26T12:54:00.000-08:00

Stundum getur netið verið sniðugt, og einstaka sinnum getur mæspeis verið sniðugt líka. Var að finna á mæspeis hljómsveit að nafni The Sword sem ég er svona líka rosalega ánægður með. Alveg með eindæmum hresst og skemmtilegt tudda stónerrokk/þungarokk. Líklega best lýst sem blöndu af Black Sabbath og Mastodon, eða eitthvað álíka. Mæli bara með að þið kíkið sjálf á mæspeisið þeirra og njótið þeirra laga sem þar er að finna. Lengi lifi hresst þungarokk !

The Sword

Flipp á faraldsfæti

2006-11-23T16:22:00.000-08:00

Síðasta laugardag kíkti ég stuttlega heim á klakann. Ástæða þess var að ég og Gaui ákváðum að koma óvænt í grímupartý til Birnu og Einars. Okkar fannst það voða sniðugt þar sem við gætum verið í búning og allir að spá hverjir þetta væru og ég veit ekki hvað. Klukkan var reyndar 5 eða 6 um morguninn og við vorum á Beduhin Bar að sötra öl númer eitthvað, EN hugmyndin þótti samt góð daginn eftir og flugmiði var verslaður. Eftir magnaða Slayer tónleika á föstudagskvöldinu var þá drifið sig heim frá Svíþjóð til að fara að sofa og vakna í flug daginn eftir. Þrátt fyrir mikla líkamlega þreytu eftir tónleikana var maður svo uppstrekktur eftir Slayer að það gekk hægt að sofna. Það tókst þó að lokum og það tókst svo að vakna og drífa sig upp á Kastrup svo maður gæti lagt sig í flugvélinni. Klukkan ca. 14:30 á staðartíma var maður svo kominn í frostið á Íslandi og Karl Jóhann nokkur var svo elskulegur að ná í mig. Svo var drifið sig út á nes og hurðin heima opnuð. Foreldrar mínir fengu vægt flog þegar ég birtist skyndilega inn um dyrnar og ætlaði að sækja fötin mín sem ég hafði gleymt á þvottasnúrunni í haustfríinu. Þau höfðu meira að segja verið svo sniðug að slysast til að kaupa of mikið af kjöti í matinn svo ég fékk kindafilé og rauðvín með. Endurfundir gleðilegir með öllu. Svo var það að malla forlátan draugabúning úr laki, hafa með sér bjór, gítar, 1L af Opal til að gefa, sækja Guðjón, sækja Kalla og drífa sig í partý.
Ég hélst nú ekki óþekktur lengi þar sem Einar þekkti mig strax þrátt fyrir lakið. En partýið var voðalega skemmtilegt og það var mikið trallað, drukkið, sungið, spilað á gítar, horft á myndbandið um Kameloso, búningar sýndir og mikið snjóað á meðan. Maggi á að klæða sig eins og kafteinn Kolbeinn að staðaldri! Svo snjóaði svona hressilega. Gekk eitthvað að hægt að koma sér heim, en við fengum svo að lokum rasista leigubílstjóra sem lét nokkur miður falleg orð falla um hörundsdökkt fólk þegar hann keyrði framhjá svörtum strák sem var að bardúsa við reyna að labba í gegnum snjólagið.
Sunnudag var meira af veislumat heima og svo kíkt til Gunna að skoða betur nýju höllina í Árbænum. Þar tókum við á því og gláptum á Mission Impossible 3 og gamlan Bond.
Mánudag var svo planið að fara í bíó að sjá Bond. Ég var samt sá eini af vinum mínum sem komst inn þar sem skyndilega var mættur múgur af fólki í Regnbogann sem vildi sjá Bond og ég var sá eini sem mætti tímanlega. Hefði keypt miða handa þeim en það var enginn þarna þegar ég mætti svo ég hafði engar áhyggjur af þessu. Þeir fóru víst á Mýrina í staðinn. Bond var góður, mæli með honum.
Snemma á þriðjudagsmorgni var svo alvaran tekin aftur við og flogið til Køben þar sem mín beið að fara upp í DTU að klára síðustu skýrlsuna í Acoustic Communication með vinnuhópnum mínum.
Eini gallinn var hvað maður var stutt og gatt ekki hitt alla sem mann langaði að hitta. Verð sem betur fer töluvert lengur heima (svona 4 vikum meira) þegar ég kem heim eftir jólaprófin. Hver veit nema mér takist að halda eitthvað gott partý í tilefni 25 ára afmæli míns þann 27 desember. Sjáum hvað gerist ;)

Slayer !!!

2006-11-17T16:52:00.000-08:00

Ég var að koma af Slayer tónleikum í Malmö í Svíþjóð ! Það var drullugaman ! Ég fór fremst í moshpittinn og hoppaði og skoppaði eins og rugludallur ! Brenndi örugglega 7000 kaloríum ! Hlýtur að hafa verið hollt ! Keypti bol, hann er töff ! Sá pabba með 5 ára son sinn sem hann var búinn að kaupa á Slayer bol, Slayer húfu og setja á iðnaðar heyrnahlýfar ! Hann var svalastur af öllum :)

Að hafa hár, eða meira hár. Þar liggur efinn

2006-11-12T08:00:00.000-08:00

Ólafur Haukur nokkur, góð vinur, sambýlingur, og gagnkynhneigður lífsförunautur, hefur heimtað að ég setji upp netkosningu. Einu sinni leit ég út u.þ.b. svona:

sýnist samt að ég sé örugglega tiltölulega nýklipptur á þessari mynd þar sem hárið á mér var að staðaldri aðeins síðara en þarna. Gekk eitthvað illa hjá mér að finna myndir af mér frá þessum tíma. Þar sem ég var ekki alveg jafn úbervirkur í kórfélagslífinu þá og síðar varð raunin. Þeir sem vilja því kanna málið frekar ættu því að skoða meira af myndum úr eldra myndasafni kórsins.
Óli alla vega saknar lubbans og vill fá hann til baka. Hefur aldrei verið ánægður með þá ákvörðun mína að klippa mig. Núna lít ég út u.þ.b. svona:

Til að friða Óla ætla ég því að setja hér fram netkosningu. Með atkvæði Óla hefst því staðan sem:
sítt hár 1 vs minna sítt 0

Öllum sem langar að leggja atkvæði í belg er frjálst að gjöra svo.

Plötubúðir eru hættulegar fjárhag mínum

2006-11-10T08:58:00.000-08:00

Ég get einfaldlega ekki stigið inn í plötubúð án þess að kaupa eitthvað. Skelfilegur sjúkdómur. Í dag fór ég að þvælast um Køben með honum Birni Önundi að skoða orgell. Skoðuðum meðal annars flott notað orgell með meðfylgjandi Leslie snúningsmagnara á 16.000 DKK = 186400 ISK. Hægt að fá gott 70's rokksánd úr slíkum grip, auk ýmissa annarra skemmtilegra hljóða. Svo fórum að þvælast niður í bæ og kíkti ég í nokkrar hljóðfæraverslanir líka því mig langar í Fendar Jazzbass, helst með aktívum pikköppum. Danir vilja þó fá 5000 - 7000 DKK = 58250 - 81550 ISK fyrir slíkan grip, held minnst 6500 DKK = 75725 ISK ef pikköpparnir voru aktívir. Finnst það heldur mikið fyrir grip framleiddan í Mexíkó. Svo enduðum við á að kíkja inn á TP Musik Marked þar sem Björn hafði aldrei stigið þar fæti inn þrátt fyrir að hafa búið hér í meira en eitt ár. Þar sé ég að sjálfsögðu Beneath The Remains með hressu brasilísku strákunum í Sepultura á tilboði og stenst því ekki freistingu að bæta henni við safnið. Sé svo líka Doolitle með Pixies sem mig vantaði líka. Hleyp því með þessar tvær plötur að afgreiðslukassanum og greiði fyrir 140 DKK = 1631 ISK áður en ég enda með að kaupa eitthvað meira. Hefði eflaust endað með að kaupa plötu með Herbie Hancock sem var þarna á tilboði ef ég hefði ekki drifið mig í að borga.

Mig langar í meiri músík

2006-11-07T12:00:00.000-08:00

Nú eru komnir meira en 2 mánuðir í Danalandi og engar hjómsveitaæfingar, engar kóræfningar, ekkert. Farinn að fá fráhvarfseinkenni á hæsta stigi. Alveg kominn með upp í kok að sitja einn á kvöldin og glamra lög á rafmagnsgítar sem er ekki tengdur í samband. Mig langar að fara að spila eitthvað. Hresst og skemmtilegt, stóner-skotið pönk rokk. Eða blanda saman stónerrokk riffum með hressum jazzpíanó línum. Eða eitthvað gott þungarokk, blanda saman áhrifum frá Megadeth, Slayer, Pantera, Fear Factory og ég veit ekki hvað í pakka sem hægt er að brúka til að hoppa við og skoppa, auka tíðni hálsríga og ergja leiðinlega nágranna. Ég vil sjá lausn á þessu vandamáli, en það verður líklega að bíða heimfarar. Verður víst æfingarherbergi á kollegíinu sem ég er að fara flytja í. Kannski ég kenni sjálfum mér að tromma eða eitthvað til að róa taugarnar. Ef það verður trommusett þar.

Meiri Gleði

2006-11-06T11:07:00.000-08:00

Ég er víst kominn með 13 m2 íbúðarholu í Hørhuskollegi í amager, c.a. 10 - 20 mín fjarlægð frá þar sem ég er núna. Ætti því að verða orðinn sjálfs míns herra með eigið húsnæði eftir einhverja daga. Svo pantaði ég mér miða í gær á Unholy Alliance Tour í Malmö 17 nóvember. Fæ þá að sjá gömlu stuðboltana í Slayer á sviði. Verður ekki leiðinlegt !

Gleðilegir dagar

2006-11-04T04:27:00.000-08:00

Í gær var J-dagurinn. Þá kom jólabjórinn og allir fögnuðu mikið, við að sjálfsögðu líka. Í gær átti Karl Jóhann líka afmæli, náði þeim merka rokk-aldri að verða 27 ára. Það er að sjálfsögðu gleðilegt og ég vona að menn hafi fagnað mikið á Íslandi og hann synt í gjöfum. Fær alla vega formlegar hamingjuóskir hér á netsvæðinu mínu.
Annars langar mig að vita af hverju UNICEF og amnesty fólkið er alltaf að elta mig þegar ég er að hlaupa í lest eða koma heim úr lest. Gerist ansi reglulega að þau sjá mig og taka jafnvel krók í gegnum annað fólk til að fá að segja mér aðeins frá því sem þau eru að gera. Ég þarf þá ávallt á misbjagaðri dönsku að segja þeim að ég sé fyrir löngu byrjaður að gefa þeim heima á Íslandi og láti af hendi mánaðarlega fjármuni sem gæti dekkað handa mér kippu af bjór. Og svo þarf ég að hlaupa svo ég missi ekki af lestinni. Ég skil samt alveg af hverju þau elta fólk eins og mig. Eldra fólkið segir vanalega strax nei og nennir ekkert að hlusta á þau. Við hin vanalega stoppum og endum með að gefa eitthvað. Þó það sé ekki mikill peningur í okkar augum þá gerir það samt helling.
Ég hef líka einu sinni verið stoppaður fyrir utan metróstöð og verið boðin klipping. Kona og stúlka sem voru að læra hárgreiðlsu í skóla nálægt stöðinni fannst ég hafa voðalega klippivænt hár og langaði að gefa mér klippingu samkvæmt nýjustu tísku og lita hárið á mér. Ég ákvað að afþakka það pent. Þar sem maður er nú orðinn einbúi í steinsteypufrumskóginum er líklega frekar við hæfi að maður fá sér alvöru einbúa hárgreiðslu og geri eitthvað minna af því að klippa hár sitt og raka. Sjáum hvernig það fer.

Roadtrip og HAMingja

2006-10-29T13:36:00.000-08:00

Aðfaranótt síðasta miðvikudags tókst mér ekki að sofa neitt um nóttina. Það var svona verra þar sem kl 7 um morguninn átti ég að vera mættur upp í Lyngby þar sem okkar biðu bílaleigubílar sem átti að nota til að keyra um Jótland í boði DTU og heimsækja bæði Álaborgarháskóla og Bang & Olufsen. Keyrt var af stað og ferja tekin til Jótlands og svo keyrt áfram til Álaborgar þar sem við fengum vondar samlokur með lifrakæfu og súrgúrkum. Síðan var skoðað námskerfið í skólanum. Þar byggir allt á hópverkefnum. Þú ferð í einhverja fyrirlestra um fræði og gerir svo eitt stórt hópverkefni þar sem þú átt að þurfa að nýta þér fræðina úr fyrirlestrunum og byggist lokaeinkunin þín á niðurstöðum úr verkefninu og spurningum um það sem þú þarft að svara. Mastersverkefnið hjá þeim yfirleitt líka hópverkefni. Væri alveg sniðugt að gera eitt svona verkefni, en ég myndi ekki nenna að hafa allt námið mitt svona. Auk þess grunar mig að mann muni aðeins skorta í fræðilegum grunni. Skoðuðum líka rannsóknarverkefni hjá þeim eins og t.d. 3D hljóð og heyrnaskaða af völdum heyrnatóla, svo eitthvað sé nefnt. Þar var svefnleysið farið að segja svolítið til sín og stundum erfitt að halda sér vakandi í rannsóknarherbergjum með þungt loft. Að túrnum loknum fengum við svo ávexti og bjór, áður en haldið var af stað að finna hostelið okkar. Um kvöldið var svo matur og djamm með skólafélögunum og eins og sönnum Íslendingi sæmir var ég að sjálfsögðu með síðasta fólki heim, kominn í bólið um 4 leytið. Hafði þá verið vakandi í ca. 40 tíma. Fékk rétt rúmlega 4 tíma svefn áður en ég þurfti að vakna og haldið var af stað til Bang & Olufsen. Smá svefn í bílnum bjargaði miklu og í Bang & Olufsen fékk maður að sjá t.d. Heimabíó kerfi sem kostar 5 milljónir, hljóðprufunarherbergi, Audi með innbyggðum ofurgræjum og annað svalt. Þeir gáfu okkur líka fullt að borða, var vel sáttur með það. Ég mátti samt ekki fá magnara og hátalarakeilu, það var smá bömmer. Væri ekki leiðinlegt að vinna þarna, ef fyrirtækið væri ekki staðsett í smábæ á miðju Jótlandi. 11 um kvöldið var maður svo loksins kom heim, þreyttur, eftir skemmtilega ferð.
Á laudardaginn fékk ég svo loksins að sjá HAM eftir miklar tilraunir. Allt er þegar þrennt er. Þeir voru hressir og þéttir og renndu í gegnum sína helstu slagara, ásamt einu og einu nýju lagi. Allir í svörtum jakkafötum, nema Óttar sem var í hvítu, með sítt hár og skallablett. Fór svo úr að ofan, grindhoraður og með girt næstum upp á nafla. Fengu því miður bara að spila í tæpan klukkutíma þar sem þetta var 5 hljómsveita dæmi.
Allt í allt ágætis vika, þó svefninn hefði mátt vera minna slitróttur.
Sjáum hvað sú næsta ber í skauti sér.

Metalocalypse

2006-10-24T18:34:00.000-07:00

Þetta eru opinberlega orðnir nýju uppáhalds þættirnir mínir. Langar að komast yfir metal kaffi-jingúlið ! Tjekk it át:

Metalapocalypse: The Curse Of Dethklokk

Svo þú heldur að þú kunnir að dansa ?

2006-10-15T08:51:00.000-07:00

Nei, ég held ekki neitt, veit vel að ég kann lítið fyrir mér á því sviði. Kíkti með vinum (meira vinkonum) á salsakvöld á Cafe Cultura í gær. Þar var fullt af fólki sem fetti sig og beygði við salsa taktinn og var með þetta á hreinu. Ég gerði loks eftir smá öldrykkju heiðarlegar tilraunir en, eins og flestir norður germanskir karlmenn, þá fékk ég nú ekki dansgen í vöggugjöf. Ég væri þó alveg til í að kunna eitthvað að dansa, lúkkar soldið kúl að geta gert sig að nafla alheims á dansgólfinu. Geri það kannski að verkefni framtíðarinnar að ef ég einhvern tíman eignast kærustu að draga hana á námskeið. Hver veit, ég gæti jafnvel verið búinn að læra grunnsporin áður en ég verð 37 ára.

Reif í tólið

2006-10-08T08:24:00.000-07:00

Hver man ekki eftir árunum 1995 - 1997 þegar teknó var heitara á Íslandi en steikt slátur ? Þá hlustaði ég á teknó og við vinirnir áttum ófáa rúnta á litlu súkkunni hans Atla að blasta Prodigy, en Atli átti einn og hvern einasta disk sem þeir höfðu gefið út. Gunni átti líka risa safn af teknó/drum&bass sem er núna týnt. Í gær var nelgdur síðasti naglinn í teknósögu minni þegar ég kíkti í Rave-partý í yfirgefinni lestarskemmu í Køben. Ég, Gaui og Ketill vorum að hanga í eldhúsinu á hæðinni hans Ketils á Grønjords kollegi þegar félagi hans gengur inn og bendir á það sé rave-partý niðrí bæ og hvort okkur langi ekki að kíkja. Enginn okkar hafði farið á slíkt og því var ákveðið að skella sér. En fyrst þurfti að komast þangað og upphófst þá leit að hjólum fyrir utan kollegíið. Þar voru engin citybike og engin hjól í lagi sem höfðu verið skilin eftir. Tókum þá lestina upp á Nørreport og fundum þar í kring 2 stk citybike og eitt bilað hjól sem við smelltum aftur á keðjunni. Þá var bara að finna skemmuna. Hjólatúr og símtali síðar vorum við komnir á staðinn og eftir smá príl og rölt um myrkvaða ganga mátti sjá hvar það var búið að setja upp hljóðkerfi og fólkið skoppaði um meðan sami teknótakturinn ómaði í nokkrar mínútur áður en nýr taktur fór í spilun við fönguð skoppenda. Á staðnum voru krakkar að selja bjórdósir og orkudrykk með vodka. Röðin töluvert mikið styttri í bjórröðina sem hentaði okkur ágætlega. Þannig að, þarna stóðum við í nokkurn tíma og sötruðum nokkra bjóra og tókum inn teknómenninguna. En ég er greinilega orðinn gamall, eða kannski var teknó aldrei mitt dót. En þetta er sniðug hugmynd að nýta svona rosa húsnæði í eitthvað skemmtilegt, hefði bara verið meira mitt kaffi ef þetta hefðu verið pönkrokkhljómsveitir að spila 1-2 mínútna löng lög með 3 gripum, eða sækadeligg stónerrokk. Vil sjá svoleiðis menningu komast í gang heima ! Svo fór maginn að kalla og niðrí í miðbæ fundum við kebab og svo strætó heim. Þannig að núna get ég sagts hafa farið í rave-partý.

Af Finnum og Færeyjingum

2006-10-05T13:02:00.000-07:00

Í gær kíkti ég á fyrstu þungarokkstónleikana mína í Køben þegar ég kíkti að sjá Týr. Það hafði eitthvað lið ákveðið að vera drukkið og með læti nóttina áður svo ég var ekkert voðalega vel sofinn og ákvað því að fá mér smá blund eftir skóladaginn svo maður myndi hafa einhverja orku afgangs um kvöldið. Um 17:55 vaknaði ég við símhringingu frá honum Juha Holm, finnska félaga mínum úr DTU sem ég ætlaði að hitta á tónleikunum, en hann var með vini sína frá Finnlandi í heimsókn og langaði að athuga hvort ég hefði áhuga á að borða með þeim og fá mér fordrykk. Ég dreif mig þá á lappir eftir ca. klukkutíma blund, skellti mér í sturtu, skellti í mig einum Red Bull og rölti af stað í Metróið. 5 mín Metróferð og nokkra mínútna rölti um Strikið síðar var ég svo búinn að finna Finnana og við drifum okkur í að kaupa okkur 0.75 cl bjóra og aðgang að hlaðborði sem var á veitingastaðnum. Juha og vinir hans, annar Juha og stelpa að nafni Miin (alla vega borið fram mín, veit ekki hvernig það er skrifað), eru eins og flestir Finnar sem ég hef spjallað við, mikið áhugafólk um þungarokk, Miin meðal annars bassaleikari í dauðarokksbandi í Finnlandi (af hverju eru 90% stelpna í hljómsveitum bassaleikarar ???). Það var því mikið spjallað um þungarokk, land og þjóð á Íslandi og land og þjóð í Finnlandi. Eftir eitt stykki Baileyskaffi í eftirrétt var svo haldið af stað á The Rock, sem ku vera stærsti rokkbarinn í Køben, og drógu Finnarnir þá upp úr tösku gin & tónik til að halda okkur mjúkum fyrir tónleikana. The Rock er síðan svo sniðugur bar að þar er bjór seldur í 1.5 L könnum á 99 DKK. Það sem átti upphaflega að vera rólegt tónleikakvöld var því hratt og örugglega að breytast í mesta partý sem ég hef komist í síðan ég kom til Køben. Fyrst á svið var dönsk þjóðlagagrúppa sem spilaði miðaldartónlist. Alveg ágætis band til að byrja kvöldið á og hlusta meðan nokkrum könnum af øli var slátrað. Ég passaði mig að sjálfsögðu á að vera landi og þjóð til sóma og setja gott fordæmi í ølþambinu. Spjallaði einnig við nokkra heiðna Dani sem sátu á sama borði og við og komst að því að það eru um 2000 ásatrúamenn í Danmörku. Held það séu um 1000 á Íslandi þ.a. við erum greinilega aðeins meira heiðinn hlutfallslega. Næstir á svið voru Holmgang, frekar einhæf og óspennandi dauðarokkssveit sem var alla vega ekki að gera mikið fyrir mig. Týr liðar stigu svo á svið á eftir þeim í hringabrynjuvestum og með þórshamra um hálsinn. Þeir voru ansi hreint vel spilandi og eiga alveg þó nokkur skemmtileg lög, sérstaklega þá þau sem þeir syngja á færeysku. Hafði bara þó nokkuð gaman af þeim og var slagarinn vinsæli Ormurinn Langi spilaður í uppklappi. Eftir að Týr voru búnir var þá haldið af stað að finna bar sem væri opinn. Rákumst þar á danska stelpu sem ákvað að gerast vinur okkar, fann fyrir okkur bar með ódýrum bjór og keypti handa okkur umgang áður en kærastinn hringdi í hana og hún þurfti skyndilega að fara. Böggaði okkur ekkert þar sem við græddum fríkeypis bjór. Henni tókst samt einhvern veginn að sjá það út að ég væri Íslendingur á augunum á mér, vissi ekki að við Íslendingar værum með einkennandi augu ? Svo var rölt á Andy's bar og síðasta bjór kvöldsins slátrað. Eftir það tók við nokkuð kostuleg heimferð hjá mér þar sem ég þvældist um Køben í leit að næturstrætó sem myndi fara með mig á kollegíið. Fann meðal annars eitthvað hjólhræ með engum ljósum og frekar vafasömum bremsum sem ég notaði til að flýta för minni. Fann svo loksins strætó númer eftir ágætis hjólatúr N81 sem fór með mig heim.
Vaknaði svo skelþunnur í morgun um 11:30, verslaði þynnkumat á McDonalds og dreif mig upp í skóla til að gera eitt stykki verklega æfingu sem fól í sér að hlusta á alls konar tóna og suð í heyrnatólum. Hafði svo því miður ekki heilsu til að fara á Taekwondo æfingu. En það er víst gjaldið sem líkaminn þarf að borga þegar það er of mikið fjör daginn áður.

Metal: A Headbangers Journey

2006-09-25T15:16:00.000-07:00

Ég var að enda við að horfa á þessa skemmtilegu heimildarmynd eftir metaldúdda sem er master í mannfræði. Drauma mannfræðiverkefnið hans var víst að kanna hvað væri svona spes við þungarokk svo hann gekk í það að gera þessa ansi skemmtilegu heimildarmynd. Mæli hiklaust með að kíkja á hana ef þið hafið annaðhvort gaman af þungarokki eða eruð bara forvitin að vita hvað sé málið. Mig er alla vega farið að langa að hlusta á meira þungarokk en ég hef gert upp á síðkastið :D
Nokkrir punktar:

- Dee Snider hættir aldrei að koma mér óvart með hvað hann er skemmtilegur í viðtölum.
- Að heyra rauðhnakkana í Cannipal Corpse tala um minnkaðar fimmundir og tónlistarfræðina á bakvið þungarokk er fyndið.
- Ronnie james Dio er ekkert smá lítill !!!
- Tom Arya er kaþólikki ... sá ekki fyrir mér að það gæti gengið upp þegar menn eru söngvarinn og bassaleikarinn í Slayer. Guð ku víst ekki hata okkur því Guð hatar ekki. Spurning hvað Kerry King finnst um það (líklega alveg sama þar sem hann var þarna rétt hjá)
- Álit mitt á svartþungarokki batnaði ekkert. Hvernig þessir sauðdrukknu, uppdópuðu og rugluðu Norðmenn með rauðvínssafnið sitt fá það út að kristni hafi verið þvinguð á þá og þeir þurfi að brenna mörg hundruð ára gamlar kirkjur mun ég aldrei skilja. Þyrftu að opna eins og eina sögubók. Engin kristin þjóð í Evrópu hafði nokkurn mátt til að vera þvinga kristni upp á Skandinava fyrir þúsund árum, þeir sáu um það alveg sjálfir að gerast kristnir.

Og örugglega einhver sniðug augnablik sem ég er að gleyma.

Shai Hulud

2006-09-21T06:46:00.000-07:00

Í dag er hljómsveitin Shai Hulud að fara að spila á Íslandi. Þeir gerðu það líka fyrir að ég held 2 árum og þá kíktum við Kalli á tónleika og höfðum frekar mikið gaman af (alla vega ég, held hann líka). Shai Hulud eiga þann heiður að hafa ollið því að ég fór að hlusta á harðkjarnatónlist, en fyrir um 3 árum síðan eða svo lét Kalli mig hafa þrjá diska til að sýna mér hvað harðkjarnapönkmetall væri nú sniðugur. Það var diskur með safn af lögum með Dillinger Escape Plan, Everything You Wanted to Know About Silence með Glasjaw (minnir alla vega að diskurinn hafi heitað það) og safn af lögum með Shai Hulud. Það tók smá tíma að melta þetta en á endanum voru það melódísk gítarriff, hraði og krafturinn í Shai hulud sem gripu mig. Tókst svo aðeins síðar að komast inn í DEP og þaðan yfir í bönd eins og Converge, Botch, Drowningman, Breach, Poison the Well og meira af þesslags dóti sem ég er að gleyma að telja upp í augnablikinu.
Shai Hulud var stofnað í kringum 1995 og er nafnið þeirra komið af risaormunum úr Dune sögum Frank Herbert. Fyrsta platan sem þeir gáfu út var smáskífan A Profound Hatred of Man frá árinu 1997 og innheldur 3 lög, þar meðal hið ofurhressa Soil sem er eitt af mínum uppáhalds Shai hulud lögum ásamt This Wake I Myself Have Stirred af fyrstu breiðskífu þeirra, Hearts Once Nourished With Hope And Compasion sem kom út 1998. Mikið hefur verið um mannabreytingar í bandinu og er aðalgítarleikari þeirra, Matt Fox, sá eini sem hefur verið í bandinu frá upphafi. Bassarleikarinn Matt Fletcher hefur þó einnig verið í bandinu megnið af líftíma þess og sjá Matt-arnir tveir að mestu um að semja lög sveitarinnar. Fyrsti söngvarinn hætti um það leiti sem þeir voru að taka upp fyrstu smáskífuna, en í hann stað kom barkinn Chad Gilbert, og næstu ár var nokkuð um uppstokkanir á mannskap og hætti Gilbert sem söngvari um 2000. Bandið tók þátt í að gefa út slatta af split plötum með hinum og þessum hljómsveitum áður en þeir gáfu sína aðra breiðskífu, That Within Blood Ill Tempered árið 2003.2004 ákvað þriðji söngvari sveitarinnar að segja upp starfi sínu. Þá var ákveðið að taka einn lokatúr áður en bandið myndu hætta og kom Gilbert tímabundið til baka til að taka þátt í túrnum. Það var einmitt á þessum túr sem þeir komu við hérna. Eftir túrinn hætti bandið og héldu Matt & Matt áfram söngvaralausir sem The Warmth of Red Blood. Í mars á þessu ári ákváðu þeir hins vegar að halda áfram undir gamla nafninu, Shai Hulud, með söngvaranum úr Zombie Apocalypse hliðarverkefni þeirra. Svo líður hálft ár og núna eru þeir að fara að spila heima á Íslandi í dag. Svo er spurning hvort það fari þá að koma plata einhvern tíman bráðlega.

Live In Reykjavík

Ég á rúm og sófa

2006-09-20T14:04:00.000-07:00

Í dag er mðvikudagur. Miðvikudagar eru stærðfræðidagar. Þá er á dagsrká hjá mér fyrirlestur um hlutafleiðujöfnur fyrir hádegi, svo dæmatími, hádegi, annar fyrirlestur um hlutafleiðujöfnur og svo dæmatími til 17:00. Sem sagt hlutafleiðujöfnur frá 9:00 - 17:00. En þegar stærðfræðinni var lokið kíkti ég á heimasíðu Ikea og komst að því að svefnsófinn sem ég hafði skoðað í búðinni í síðustu viku, og var ekki til á lager þá, var kominn aftur á lager. Þá var bara strax skundað með strætó til Ikea og eftir smá leit á lagernum, vopnaður lista sem starfskona Ikea lét mig hafa, var ég búinn að fjárfesta í þessu fína rúmi/sófa. 2 tímum síður kom svo heimsendingarbílinn með það að íbúðinni hans Óla á Øresundskollegi. Vopnaður sexkant tók ég mig svo til og smellti rúminu saman meistaralega. Sænsk húsgögn eiga sko ekkert í lagni mína með einföld verkfæri eins og sexkant og skrúfjárn. Á morgun þarf ég svo ekki að vakna snemma til að ná lest í skólann og get því leyft mér að sofa út á nýju rúmmi. Eintóm gleði :D

Stundum er erfitt að vakna á morgnanna

2006-09-19T10:33:00.000-07:00

Í dag var svoleiðis dagur. Vaknaði kl 6 í morgun við það að einhver staðar í húsinu var vekjaraklukka að missa sig og enginn að slökkva á henni. Ég átti að mæta kl 8:30 í skólann svo síminn var stilltur á að vekja mig klukkan 7. Náði nokkrum auka mínútum af svefn áður en hann fór af stað. Langaði mikið að halda áfram að sofa, en píndi mig á lappir og maulaði skál af kornflögum áður en haldið var út og í átt að strætóstoppinu. úti var öll umferðin í skralli og strætóarnir komust hægt áfram og voru alltaf fullir þegar þeir loksins komu svo ég neyddist til að gefa strætóinn upp á bátinn og labba rösklega að næsta Metro (neðjarðarlestin) stöð. Þegar Metroið var búið að skila mér á Nørreport kom á daginn að tölvukerfið sem stýrði lestunum var í skralli og þær því í tómu tjóni. Þá var ekkert annað að gera en að troða sér í þvöguna sem vildi komast í strætóinn í átt að DTU. 30 mín af stappaðri strætóferð síðar var ég svo loksins kominn í skólann og tókst að mæta aðeins 15 mín of seint í tíma með svart kaffi í pappaglasi við hönd. Fólk var svo týnast inn í stofuna fyrsta klukkutíman svo ég var greinilega ekki einn um að eiga myglaðan morgun.
Fékk svo líka Office Space atvik þegar ég ætlaði að prenta mér glósur en prentari var alltaf að stífla sig og heimta með jöfnu millibili að ég reddaði því. Prentarar sem virka ekki eru með mest óþolandi hlutum sem til eru, ásamt faxtækjum, ljósritunarvélum og C++ forritum.
En, núna er ég búinn að ná að leggja mig í klukktíma, fara í sturtu og orðinn hress. Á morgun kemur nýr dagur og hann getur ekki annað en verið minna myglaður en dagurinn í dag. Kannski að Ikea verði jafnvel búið fá aftur dýnur fyrir svefnsófa svo ég geti eignast rúm og bjargað sjálfum mér frá baktengdri örorku :D

Ævintýri Þóris

2006-09-12T09:45:00.000-07:00

í gær hóf ég að æfa Taekwondo í Danmörku. Ég er þess eðlis að ég verð bara að fá að hreifa mig reglulega og því varð fyrir valinu taekwondo klúbbur sem er tiltölulega nálægt skólanum upp í sveitinni Lyngby. Björn ákvað að slást með í för þar sem honum fannst hann vanta hreyfingu og með kort að vopni var haldið af stað að leita. Ákváðum að gefa okkur góðan tíma og tókum því strætó klukkutíma áður en æfingin átti að byrja. Kl 18:10 að dönskum tíma fórum við út á stoppi sem heitir Virum station (Virum úthverfi í Lyngby) og hófum að rölta í það sem við töldum vera rétta átt. Hins vegar var kortabókin ekki með þetta sveitahverfi á sínu prenti og við því ekki vissir hvort við værum að fara í rétta átt. Hófum því að rölta til baka og komum við á bensínstöð þar sem Björn spurði afgreiðslustúlkuna til vegar (Björn með reynslu af nokkura mánaða vist í kollegi með sameiginlegu eldhúsi talar aðeins betri dönsku en ég). Hún reyndist ekki vita mikið meira um svæðið en við, en hafði aðgang að stærri kortabók, svo okkur tókst að komast að því að við höfðum verið að fara í rétta átt eftir allt saman. Rölt aftur til baka og loks komið að gatnamótum sem við vissum að við áttum að beygja á, en ekki í hvora áttina. Við tókum að sjálfsögðu vitlausa beygju til að byrja með og þurftum að rölta aftur að gatnamótunum og taka hina beygjuna áður en við loksins fundum skólann. Þá var klukkan orðin 18:57. Taekwondo klúbburinn var lítill, hress og vinalegur og við tóku 2 tímar (jebb, æft frá 19 - 21) af hlaupum, spörkum, höggum, armbeygjum, magaæfingum, hoppum, tækniæfingum, fleiri armbeygjum, almennu sprikli og teygjum. Sjaldan liðið jafnvel og eftir þessi átök og Björn einnig hinn ánægðasti, þ.a. ég er kominn með 2 - 3 æfingar í viku af taekwondo og svo körfubolti einu sinni í viku líka. Mín íþróttamál á hreinu. Hins vegar var mér tilkynnt það í dag á skrifstofu stúdentagarðanna hérna að ég eigi ekkert von á að fá inn á stúdentagarð fyrr en í fyrsta lagi eftir 2 - 4 mánuði, svo ég verð víst að fara að finna mér heimili á almennum markaði. Vonandi að ég finni eitthvað kósí sem kostar ekki bæði hönd og fót (hef talsverð not af útlimunum mínum). Krosslegið puttana fyrir mig.

Kominn með danskan síma !

2006-09-08T07:13:00.000-07:00

Ef þið þurfið að ná í mig meðan ég er í Danmörku, þá er bara að slá inn +45 2650 1796 og ég mun svara hress á hinni línunni.

Matarhornið - Kabli Chane

2006-09-08T06:52:00.000-07:00

Þar sem ég er núna kominn á það stig í mínu lífi að þurfa að láta námslán duga fyrir leigu, mat, síma, bjór og ýmsu öðru ætla ég að henda hér inn uppskrift að indversku grænmetiskarrý frá austanverðu Indlandi sem er bæði virkilega gott á bragðið, inniheldur flest nauðsynleg næringarefni og dugar til að fæða 4 manneskjur fyrir ca. 500 - 600 kr kostnað, þ.e. ef menn eiga til kryddin (annars er startkostnaðurinn af þeim aðeins meiri, en þau endast líka ansi lengi).

250g kjúklingabaunir
800ml lítrar af vatni
2 stórir laukar
dós af söxuðum tómötum
biti af ferskri engiferrót
1 grænn chillí pipar (má sleppa honum)
1-2 hvítlauksrif
1 tsk salt
1 tsk mulið cumin
1 og 1/2 tsk mulin kóríander
1/2 tsk turmeric
1/2 tsk chillí duft
1 tsk garam masal kryddblanda
matskeið af kóríander laufum

Byrjið á því að setja baunirnar í bleyti daginn fyrir. Látið svo vatnið leka af þeim og sjóðið í vatninu með saltinu í ca. 50 mín.
Þegar baunirnar eru búnar að fá að sjóða í ca. 30 mín skulu þið saxa fínt laukinn, engiferið, hvítlauk og chillí. Hitið pönnuna og steikið við meðalhita þar til laukurinn er farinn að verða mjúkur og aðeins brúnn. Setjið yfir kryddinn og salt eftir smekk og steikið í ca. 1 mín (hræra vel á meðan) og hellið svo yfir söxuðu tómötunum. Leyfið þessu að malla í nokkrar mínútur þ.a. tómatarnir verði að mauki. Þegar baunirnar eru búnar að fá að sjóða skuluð þið setja karrýsósuna út í pottinn með baununum og vatninu, hrærar vel saman, setja lok yfir og leyfa því að malla við lágan hita í minnst 10 mínútur. Gott er að leyfa því að malla í alveg 30 - 45 mín svo baunirnar taki í sig bragðið og sósan verði sem þykkust. Hrærið svo að lokum saman við þetta garam masal kryddblöndunni og kóríanderlaufunum og berið fram með grjónum og/eða naan brauði.

Almenningssamgöngum í Danmörku er illa við mig !

2006-09-06T14:11:00.000-07:00

Já, í dag eyddi ég 3 klukkutímum í lest og strætóferðir, sem mér finnst ekkert voðalega skemmtilegt. Byrjaði á því að fyrsti strætóinn sem ég ætlaði að taka um morguninn lokaði á mig og fór. Næsti á eftir var fullur og keyrði bara framhjá. Olli því að ég var góðan klukkutíma á leiðinni í skólann. Í skólanum tók við dagur af hlutafleiðujöfnum, kaffidrykkju og vondum mat úr mötuneitinu. Skylst að þar sé víst sjaldan eitthvað ætt að borða, þarf að fara að smyrja. Svo átti að fara að koma sér heim og stússast, en lestakerfið var í einhverju hönki og lestarnar voru ekkert að komast áfram sem olli því að það tók mig um 90 mín að komast á aðalbrautarstöðina í staðinn fyrir þessar venjulegu 20 mín. Var sem betur fer með ipodinn með mér svo ég gat hlustað á eina og hálfa plötu meðan ég beið.
Svo tapaði Ísland 2 - 0 fyrir Dönum !!!
Aldrei séð jafnlélega vörn, og það var bein útsending af stemningunni frá sportbarnum þar sem ég var. Niðurlæging dagsins fullkomnuð :(
En á morgun kemur nýr dagur sem verður vonandi hressari og landsliðið verður bara að drullast til að þétta vörnina, nýta dauðafærin og vinna næsta leik !!!

Fluttur að heiman

2006-09-03T14:43:00.000-07:00

Þennan dag, hinn 3 sept 2006, hefur átt sér stað hinn merkilegi atburður að Þórir Hrafn Harðarson er fluttur að heiman 24 ára gamall. Frónn hefur verið kvaddur og ég sestur hér að í svínakjötsparadísinni Danmörku næstu tvö árinn, fyrir utan að maður kemur heim þegar það er haustfrí, og jólafrí, og vorfrí, og páskafrí, og sumarfrí. Sem sagt hálft árið verður mar hér í Köben og hálft heima. Ég er þá líklega bara hálfnaður með það að flytja að heiman ? En það er alla vega ágætis skref, sérstaklega fyrir jafn heimakæran einstakling eins mig.